ശാസ്താംകോട്ട: ജ്വല്ലറി ഉടമയുടെ കൈയില്‍ നിന്ന് സ്വര്‍ണവും പണവും അടങ്ങിയ ബാഗ് അപഹരിച്ച സംഭവം നടന്നിട്ട് രണ്ട് മാസം പിന്നിടുമ്പോഴും പ്രതികളെ പിടിക്കാന്‍ സാധിക്കാതെ പൊലിസ് ഇരുട്ടില്‍ തപ്പുന്നു. കഴിഞ്ഞ സെപ്തംബര്‍ 21 ന് രാത്രി പത്തോടെയാണ് ചക്കുവള്ളി ശില്‍പി ജ്വല്ലറി ഉടമ ആര്‍. രമണന്റെ പക്കല്‍ നിന്നും ബാഗ് അപഹരിച്ചത്.
65 പവന്‍ സ്വര്‍ണവും 79,000 രൂപയുമാണ് നഷ്ടപ്പെട്ടത്. കട പൂട്ടുന്നതിന് മുന്നോടിയായി സ്വര്‍ണവും പണവും അടങ്ങിയ ബാഗ് പുറത്ത് വച്ച ശേഷം ലൈറ്റ് അണയ്ക്കുമ്പോള്‍ ഒരാള്‍ ഓടിയെത്തി ബാഗ് തട്ടിയെടുത്ത് പോവുകയായിരുന്നു.
ജങ്ഷനില്‍ ഉണ്ടായിരുന്ന യുവാക്കള്‍ ഇയാളെ പിന്‍തുടര്‍ന്നങ്കിലും പിടികൂടാന്‍ സാധിച്ചില്ല. ജങ്ഷനിലെ സി.സി ടി.വി ദൃശ്യങ്ങളില്‍ ഇയാളുടെ ചിത്രം പതിഞ്ഞിരുന്നുവെങ്കിലും തിരിച്ചറിയാന്‍ കഴിയാത്ത വിധം അവ്യക്തവുമായിരുന്നു.
ദൃക്‌സാക്ഷികള്‍ നല്‍കിയ വിവരണത്തിന്റെ അടിസ്ഥാനത്തില്‍ ഇതര സംസ്ഥാനക്കാരുടെ രൂപസാദൃശ്യം ഉണ്ടായിരുന്നതിനാല്‍ അഞ്ഞൂറിലധികം ഇതര സംസ്ഥാനക്കാരുടെ വിവരങ്ങള്‍ ശൂരനാട് പൊലിസ് ശേഖരിച്ചും കൊട്ടാരക്കര ഡിവൈഎസ്പി നേരിട്ട് അന്വഷണം നടത്തിയിട്ടും പ്രതിയെ ഇനിയും പിടികൂടാന്‍ കഴിഞ്ഞിട്ടില്ല.