താമരശേരി: ചുരത്തില്‍ മണ്ണിടിച്ചിലിനെ തുടര്‍ന്ന് നാലു മണിക്കൂറോളം ഗതാഗതം തടസപ്പെട്ടു. ഒന്‍പതാം വളവിനു സമീപമാണ് സംഭവം. ഇന്നലെ രാവിലെ എട്ടോടെ തുടങ്ങിയ മണ്ണിടിച്ചിലില്‍ 10ഓടെ മണ്ണും കല്ലും മരങ്ങളും വീണ് റോഡ് അടയുകയായിരുന്നു. കനത്ത മഴ കാരണം നൂറുകണക്കിന് വാഹനങ്ങളിലെ യാത്രക്കാര്‍ പുറത്തിറങ്ങാനാകാതെ വീര്‍പ്പുമുട്ടി. ചുരം സംരക്ഷണ സമിതി ഭാരവാഹികളായ വി.കെ മൊയ്തു മുട്ടായി, വി.കെ താജുദ്ദീന്‍, പി.കെ സുകുമാരന്‍, ഷാഹിദ് കുട്ടമ്പൂര്‍ എന്നിവരുടെ നേതൃത്വത്തില്‍ ഇരുപതോളം പ്രവര്‍ത്തകരും പ്രദേശവാസികളും തടസങ്ങള്‍ നീക്കാന്‍ മുന്നിട്ടിറങ്ങുകയായിരുന്നു.
തുടര്‍ന്ന് താമരശേരി സി.ഐ അഗസ്റ്റിന്‍, എസ്.ഐ സായൂജ്കുമാര്‍ എന്നിവരുടെ നേതൃത്വത്തില്‍ പൊലിസും കല്‍പ്പറ്റയില്‍ നിന്നെത്തിയ ഫയര്‍ഫോഴ്‌സും ചേര്‍ന്ന് നാലു മണിക്കൂറോളം കഠിനാധ്വാനം ചെയ്താണ് മണ്ണും മരങ്ങളും നീക്കി ഗതാഗതം പുനഃസ്ഥാപിച്ചത്. ഇതിനിടെ വയനാട്ടിലേക്ക് പോവുകയായിരുന്ന കൃഷി വകുപ്പ് മന്ത്രി സുനില്‍ കുമാറിന്റെ വാഹനവും ചുരത്തില്‍ കുടുങ്ങി. മാവോയിസ്റ്റ് നേതാവ് രൂപേഷിനെ കല്‍പ്പറ്റ കോടതിയില്‍ ഹാജരാക്കാന്‍ കൊണ്ടണ്ടുപോവുകയായിരുന്ന പൊലിസ് സംഘത്തിന് ചുരത്തിലെ ബ്ലോക്ക് ഒഴിവാകുന്നതുവരെ താമരശേരി സ്റ്റേഷനില്‍ തങ്ങേണ്ടണ്ടിവന്നു. രണ്ടോടെയാണ് ഗതാഗതം പൂര്‍ണമായി പുനഃസ്ഥാപിച്ചത്.