ന്യൂഡല്‍ഹി: ശബരിമല സന്ദര്‍ശനത്തിന് പോയ താന്‍ നിലയ്ക്കലില്‍ വച്ച് അപമാനിതനായെന്ന പരാതിയുമായി ബിജെപി നേതാവും കേന്ദ്രമന്ത്രിയുമായ പൊന്‍ രാധാകൃഷ്ണന്‍ ലോക്‌സഭാ സ്പീക്കര്‍ സുമിത്രാ മഹാജന് പരാതി നല്‍കി. നിലയ്ക്കലിന്റെ സുരക്ഷാ ചുമതലയുള്ള എസ് പി യതീഷ് ചന്ദ്രയില്‍ നിന്നും തനിക്ക് അപമാനം നേരിട്ടതായിട്ടാണ് പരാതി. സാധാരണ ഗതിയില്‍ സ്പീക്കര്‍ക്ക് ഇത്തരം പരാതി ലഭിച്ചാല്‍ അത് പാര്‍ലമെന്റ് പ്രിവിലേജ് കമ്മിറ്റിക്ക് കൈമാറുകയാണ് പതിവ്.

തുടര്‍ന്ന് പ്രിവിലേജ് കമ്മിറ്റി പരാതിയുടെ അടിസ്ഥാനത്തില്‍ അന്വേഷണം നടത്തും. ഈ കമ്മിറ്റിയുടെ അധ്യക്ഷ ബിജെപി ദേശീയവക്താവ് മീനാക്ഷിലേഖിയാണ്. മുന്‍ രാജ്യസഭാ ഉപാധ്യക്ഷന്‍ പി.ജെ. കുര്യന്‍ പറയുന്നത് താക്കീത് മുതല്‍ ജയിലില്‍ അടയ്ക്കാന്‍ വരെ കമ്മിറ്റിക്ക് അധികാരമുണ്ടെന്നാണ്. പക്ഷേ ഇത്തരം സാഹചര്യങ്ങള്‍ ഉദ്യോഗസ്ഥര്‍ ക്ഷമാപണം നടത്തുകയും അതോടെ തുടര്‍നടപടികള്‍ അവസാനിപ്പിക്കുകയാണ് പതിവെന്നും ആറു വര്‍ഷം കമ്മിറ്റി ചെയര്‍മാനായിരുന്നു പി ജെ കുര്യന്‍ ചൂണ്ടികാട്ടി.