കോഴിക്കോട്: സംസ്ഥാനത്ത് ഇടതുമുന്നണി അധികാരത്തില്‍ വന്നശേഷം രജിസ്റ്റര്‍ ചെയ്തത് രണ്ടു ഡസനിലേറെ യു.എ.പി.എ (നിയമവിരുദ്ധ പ്രവര്‍ത്തനം തടയല്‍ നിയമം) കേസുകളെന്ന് യു.എ.പി.എ ഇരകള്‍.

ഇക്കൊല്ലം മാര്‍ച്ച് മാസത്തില്‍ മാത്രം പോസ്റ്റര്‍ ഒട്ടിച്ചതിന്റെ പേരില്‍ രജിസ്റ്റര്‍ ചെയ്തത് നാല് യു.എ.പി.എ കേസുകളാണ്. യു.എ.പി.എ കേസില്‍ നേരത്തെ അറസ്റ്റ് ചെയ്യപ്പെട്ടവരാണ് വാര്‍ത്താസമ്മേളനത്തില്‍ കേസുകളുടെ വിവരവുമായി രംഗത്തെത്തിയത്. ഇപ്പോള്‍ തുടരുന്ന യു.എ.പി.എ കേസുകള്‍ മുന്‍സര്‍ക്കാരിന്റെ കാലത്തേതാണെന്ന സര്‍ക്കാരിന്റെ വാദം തള്ളുന്നതാണ് ഈ വെളിപ്പെടുത്തലുകള്‍.

പുരോഗമന യുവജന പ്രസ്ഥാനത്തിന്റെ പ്രവര്‍ത്തകനായ ലുക്മാന്‍ പള്ളിക്കണ്ടിയെ കഴിഞ്ഞ മാര്‍ച്ച് 20നാണ് ആറളത്തെ വീട്ടില്‍വച്ച് പൊലിസ് അറസ്റ്റ് ചെയ്തത്. വയനാട്ടില്‍ സി.പി ജലീലിനെ പൊലിസ് വധിച്ച സംഭവത്തില്‍ പ്രതിഷേധിച്ച് അന്വേഷണം ആവശ്യപ്പെട്ടതിനാലാണ് സഹോദരന്‍ സി.പി റഷീദിനെതിരേ യു.എ.പി.എ ചുമത്തി അറസ്റ്റ് ചെയ്തത്.

പോസ്റ്ററുകള്‍ ഒട്ടിച്ച പേരില്‍ ആറളം പൊലിസും ഇരിട്ടി പൊലിസും യു.എ.പി.എ പ്രകാരം രണ്ടു കേസുകള്‍ രജിസ്റ്റര്‍ ചെയ്തു. 65 ദിവസമാണ് ലുക്മാന്‍ പള്ളിക്കണ്ടിയെ ജയിലില്‍ അടച്ചത്. പിന്നീട് ഹൈക്കേടതിയില്‍നിന്ന് ജാമ്യം ലഭിച്ചതിനെ തുടര്‍ന്നാണ് പുറത്തിറങ്ങിയതെന്ന് അദ്ദേഹം പറഞ്ഞു.

തണ്ടര്‍ബാള്‍ട്ടിനെ പിരിച്ചുവിടണമെന്ന് ആവശ്യപ്പെട്ട് പോസ്റ്റര്‍ പതിക്കുകയും തന്റെ സഹോദരന്‍ കൊല്ലപ്പെട്ടപ്പോള്‍ കേസ് എടുക്കണമെന്ന് ആവശ്യപ്പെട്ടതിനാലുമാണ് യു.എ.പി.എ പ്രകാരം തന്നെ അറസ്റ്റ് ചെയ്തതെന്ന് വയനാട്ടില്‍ പൊലിസ് വെടിയേറ്റ് മരിച്ച സി.പി ജലീലിന്റെ സഹോദരന്‍ സി.പി റഷീദ് പറഞ്ഞു. പുരോഗമന യുവജന പ്രസ്ഥാനത്തിന്റെ നേതാക്കളായ സി.പി നഹാസ്, ശ്രീകാന്ത് എന്നിവര്‍ക്കെതിരേ യു.എ.പി.എ പ്രകാരം കേസെടുത്തതും പോസ്റ്റര്‍ പതിച്ചതിന്റെ പേരിലാണ്.

റിട്ട. ജസ്റ്റിസ് ഗോപിനാഥന്‍ അധ്യക്ഷനായ കമ്മിറ്റി യു.എ.പി.എ കേസുകള്‍ പുനപ്പരിശോധിക്കുന്നതിനുള്ള കമ്മിറ്റിയല്ല. കഴിഞ്ഞ വര്‍ഷം ജനുവരി അഞ്ചുമുതലാണ് ഈ കമ്മിറ്റി നിലവില്‍ വന്നത്. ഗോപിനാഥന്‍ കമ്മിറ്റിക്ക് കേസുകള്‍ പുനപ്പരിശോധിക്കുന്നതിനുള്ള അധികാരമില്ല. സര്‍ക്കാരിനു ശുപാര്‍ശ ചെയ്യാന്‍ വേണ്ടി കേസുകള്‍ പരിശോധിക്കാമെന്നു മാത്രം. അന്യായമായ കുറ്റാരോപണങ്ങള്‍ക്കു തടയിടാന്‍ യു.എ.പി.എ നിയമത്തില്‍തന്നെ പറയുന്ന കരുതല്‍ നടപടിയാണിത്.
അതുതന്നെ കേസിന്റെ അന്വേഷണം അവസാനിച്ചശേഷമാണ് നടക്കുകയെന്ന് അവര്‍ പറഞ്ഞു.

42 യു.എ.പി.എ കേസുകള്‍ പുനപ്പരിശോധനയ്ക്ക് വിധേയമാക്കിയെന്നു പറയുന്നത് വാസ്തവ വിരുദ്ധമാണെന്നും അവര്‍ പറഞ്ഞു.
നഹാസ് സി.പി, ശ്രീകാന്ത്, അരുവിക്കല്‍ കൃഷ്ണന്‍ എന്നിവരും വാര്‍ത്താസമ്മേളനത്തില്‍ പങ്കെടുത്തു.