തായ്‌പെയ്: സ്വവര്‍ഗ വിവാഹത്തെ തള്ളി തായ്‌വാന്‍. കഴിഞ്ഞ ദിവസം നടന്ന പത്തോളം വിഷയങ്ങളിലുള്ള വോട്ടെടുപ്പിലാണ് സ്വവര്‍ഗ വിവാഹം നിയമ വിധേയമാക്കാനുള്ള കോടതി ഉത്തരവിനെതിരേ തായ്‌വാന്‍ ജനത വിധിയെഴുതിയത്.
തദ്ദേശ ഭരണസമിതികളിലേക്കു നടന്ന മറ്റൊരു വിധിയെഴുത്തില്‍ പരാജയപ്പെട്ടതിനെ തുടര്‍ന്നു തായ്‌വാന്‍ പ്രസിഡന്റ് സായ് ഇങ്-വെന്‍ സ്ഥാനം രാജിവയ്ക്കുകയും ചെയ്തിട്ടുണ്ട്. തെരഞ്ഞെടുപ്പില്‍ ചൈന അനുകൂലികളായ പ്രതിപക്ഷമാണ് വിജയിച്ചത്.
സ്വവര്‍ഗ വിവാഹം നിയമവിധേയമാക്കി കഴിഞ്ഞ വര്‍ഷം തായ്‌വാന്‍ കോടതി വിധി പുറപ്പെടുവിച്ചിരുന്നു. നിയമം നടപ്പാക്കുകയോ പുതിയ നിയമം അവതരിപ്പിക്കുകയോ ചെയ്യാന്‍ പാര്‍ലമെന്റിനു രണ്ടു വര്‍ഷം കാലാവധി അനുവദിക്കുകയും ചെയ്തു. തുടര്‍ന്നാണ് സര്‍ക്കാര്‍ ജനഹിത പരിശോധന പ്രഖ്യാപിച്ചത്. എന്നാല്‍, പുരുഷനും സ്ത്രീയും തമ്മില്‍ മാത്രമുള്ള ഐക്യപ്പെടലാണ് വിവാഹമെന്നു തായ്‌വാന്‍ ജനത വ്യക്തമാക്കുകയായിരുന്നു.
13 നഗരങ്ങളിലെയും കൗണ്ടികളിലെയും ഭരണസമിതികളിലേക്കാണ് ഇന്നലെ തെരഞ്ഞെടുപ്പ് നടന്നത്. ഇതില്‍ തായ്‌വാന്‍ സ്വാതന്ത്ര്യത്തിനായി വാദിക്കുന്ന പ്രസിഡന്റിന്റെ കക്ഷിയായ ഡെമോക്രാറ്റിക് പാര്‍ട്ടി (ഡി.പി.പി)ക്കു പകുതിയിലേറെ സീറ്റുകളും നഷ്ടപ്പെട്ടു. 2014ല്‍ നടന്ന തെരഞ്ഞെടുപ്പില്‍ ഡി.പി.പി വന്‍ വിജയം നേടിയ സീറ്റുകളിലാണ് പരാജയം നേരിട്ടത്.