ചെര്‍പ്പുളശ്ശേരി: വല്ലപ്പുഴ റയില്‍വേ ഗേറ്റിന് സമീപം പ്രവര്‍ത്തിക്കുന്ന സ്മാര്‍ട്ട് കളക്ഷന്‍ എന്ന സ്ഥാപനത്തില്‍ നിന്ന് സാധനങ്ങള്‍ ഇറക്കിയ ഇടനിലക്കാരനെന്ന് പറഞ്ഞെത്തിയ ആള്‍ ഇവിടെ ഉണ്ടായിരുന്ന ജീവനക്കാരിയെ കബളിപ്പിച്ച് 3500 രൂപ കവര്‍ന്നതായി പരാതി.
തിങ്കളാഴ്ച വൈകീട്ട് മൂന്നരയോടെയാണ് സംഭവം. കടയിലെത്തിയ അപരിചതനായ ആള്‍ തനിക്ക് സാധനം ഇറക്കിയതിന്റെ പണം കിട്ടാനുണ്ടെന്ന് ജീവനക്കാരിയെ ധരിപ്പിക്കുകയും തുടര്‍ന്ന് കട ഉടമയായ മുസ്തഫയെ ഫോണ്‍ ചെയ്യുകയും മുസ്തഫ പണം നല്‍കാന്‍ പറഞ്ഞുവെന്ന് ഇവിടെ ഉണ്ടായിരുന്ന ജീവനക്കാരിയെ തെറ്റുദ്ധരിപ്പിച്ചുമാണ് പണം തട്ടിയത്. പിന്നീട് ഉടമയോട് ജീവനക്കാരി കാര്യം പറഞ്ഞപ്പോഴാണ് തനിക്കാരും ഫോണ്‍ ചെയ്തിട്ടില്ലെന്നും, പണം നല്‍കാന്‍ പറഞ്ഞിട്ടില്ലെന്നും വ്യക്തമാവുന്നത്.
കടയില്‍ വന്നയാളുടെ ദൃശ്യം സി.സി.ടി.വി. ക്യാമറയില്‍ പതിഞ്ഞിട്ടുണ്ടെങ്കിലും ഇയാള്‍ ഹെല്‍മറ്റ് ധരിച്ചിരുന്നതിനാല്‍ മുഖം വ്യക്തമല്ല. ദൃശ്യങ്ങള്‍ സഹിതം കട ഉടമ മുസ്തഫ പട്ടാമ്പി പൊലിസില്‍ പരാതി നല്‍കി. മുമ്പും സമാനമായ രീതിയില്‍ വല്ലപ്പുഴയില്‍ തട്ടിപ്പ് നടന്നിട്ടുണ്ടെന്നും മുസ്തഫ പറഞ്ഞു.