കോഴിക്കോട്: ഐ ലീഗ് ഫുട്‌ബോളില്‍ ഗോകുലം കേരള എഫ്.സി മൂന്നാം ജയം തേടി ഇന്നിറങ്ങുന്നു. പട്ടികയില്‍ രണ്ടാം സ്ഥാനത്തുള്ള ചര്‍ച്ചില്‍ ബ്രദേഴ്‌സുമായിട്ടാണ് ഗോകുലത്തിന്റെ മത്സരം. സീസണില്‍ മികച്ച ഫോമിലുള്ള ഗോകുലം തികഞ്ഞ ആത്മവിശ്വാസത്തിലാണ്. തുടക്കത്തില്‍ താളം കണ്ടെത്താന്‍ വൈകിയെങ്കിലും പിന്നീടുള്ള മത്സരങ്ങളില്‍ ഗംഭീര തിരിച്ചുവരവാണ് ഗോകുലം നടത്തിയത്. അവസാന രണ്ട് മത്സരങ്ങളില്‍ ജയിക്കാനും ഗോകുലത്തിനായി. ഷില്ലോങ് ലജോങിനെ 3-1 എന്ന സ്‌കോറിനും നിലവിലെ ചാംപ്യന്‍മാരായ മിനര്‍വ പഞ്ചാബിനെ 1-0 എന്ന സ്‌കോറിനുമായിരുന്നു ഗോകുലം തകര്‍ത്ത് വിട്ടത്.
മികച്ച ഫോമില്‍ കളിക്കുന്ന ടീം ജയം കണ്ടെത്തുമെന്ന ഉറച്ച വിശ്വാസത്തിലാണ്. മുന്നേറ്റനിരയില്‍ കളിക്കുന്ന അന്റോണിയോ ജര്‍മന്‍ ഫോമിലേക്ക് തിരിച്ചെത്തിയത് ഗോകുലത്തിന് പ്രതീക്ഷ നല്‍കുന്നുണ്ട്. അവസാന രണ്ട് മത്സരങ്ങളിലും മലയാളി താരങ്ങളായ വി.പി സുഹൈര്‍, എസ്. രാജേഷ് എന്നിവരുടെ മികച്ച പ്രകടനമാണ് ഗോകുലത്തിന് ജയം സമ്മാനിച്ചത്. ഇന്നത്തെ മത്സരത്തിലും സുഹൈറും രാജേഷും ആദ്യ ഇലവനില്‍ തന്നെ ഇറങ്ങിയേക്കും. ഇന്ന് ജയിക്കാനായാല്‍ ഗോകുലത്തിന് പട്ടികയില്‍ രണ്ടാം സ്ഥാനത്തെത്താന്‍ സാധിക്കും.ഹോം ഗ്രൗണ്ടിലെ മത്സരമായതിനാല്‍ കാണികളുടെ സപ്പോര്‍ട്ട് ടീമിന് കരുത്ത് നല്‍കുന്നുണ്ടെന്ന് പരിശീലകന്‍ ബിനോ ജോര്‍ജ് പറഞ്ഞു. അവസാന രണ്ട് മത്സരത്തിലും കൂടുതല്‍ കാണികളാണ് മത്സരം കാണാനെത്തിയത്. തുടര്‍ന്നുള്ള മത്സരങ്ങളിലും ഇതുണ്ടായാല്‍ ടീമിന് നല്ല പ്രകടനം പുറത്തെടുക്കാനാകുമെന്നും അദ്ദേഹം കൂട്ടിച്ചേര്‍ത്തു. പുതുതായി ടീമിലെത്തിയ തൃശൂര്‍ ഗുരുവായൂര്‍ സ്വദേശി പി.എ നാസറിനെ ഇന്ന് ടീമുലുള്‍പ്പെടുത്തും. രണ്ട് വര്‍ഷം മുമ്പ് നാസര്‍ ഗോകുലവുമായി കരാറിലെത്തിയിരുന്നെങ്കിലും പരുക്കും മറ്റു കാരണവുമായിരുന്നു താരത്തിന്റെ അരങ്ങേറ്റം വൈകിയത്. ഗോവയില്‍ നടന്ന എ.വി.ഇ.എസ് കപ്പില്‍ നാസര്‍ ഗോകുലത്തിന് വേണ്ടി മികച്ച പ്രകടനവും നടത്തിയിരുന്നു. ഇതിനെ തുടര്‍ന്നാണ് നാസറിനെ ഇന്നത്തെ മത്സരത്തില്‍ ടീമിലുള്‍പ്പെടുത്തിയതെന്ന് ബിനോ കൂട്ടിച്ചേര്‍ത്തു.