മാനന്തവാടി: അഞ്ചാമത് രാജ്യാന്തര മൗണ്ടന്‍ സൈക്ലിങ് ചാംപ്യന്‍ഷിപ്പിനുള്ള ഒരുക്കങ്ങള്‍ പൂര്‍ത്തിയായതായി ഡി.ടി.പി.സി അധികൃതര്‍ അറിയിച്ചു.
ഡിസംബര്‍ 7,8 തിയതികളില്‍ പഞ്ചാരക്കൊല്ലി പ്രിയദര്‍ശിനി എസ്റ്റേറ്റിലെ ട്രാക്കിലാണ് മത്സരങ്ങള്‍ നടക്കുക. 10 രാജ്യങ്ങളില്‍ നിന്നായി 22 വിദേശ താരങ്ങളും 40 പുരുഷ ദേശീയ താരങ്ങളും 20 വനിതാ ദേശീയ താരങ്ങളുമാണ് ചാംപ്യന്‍ഷിപ്പില്‍ പങ്കെടുക്കുന്നത്. എം.ടി.ബിയില്‍ ആദ്യമായി വനിതകള്‍ മത്സരത്തിനെത്തുന്നു എന്ന പ്രത്യേകതയും ചാംപ്യന്‍ഷിനുണ്ട്. ഏഴിന് ട്രയല്‍ റണ്ണും എട്ടിന് മത്സരങ്ങളും നടക്കും. ജില്ലാ ടൂറിസം പ്രമോഷന്‍ കൗണ്‍സിലും കേരളാ അഡ്വഞ്ചര്‍ ടൂറിസം പ്രമോഷന്‍ സൊസൈറ്റിയുമാണ് പ്രധാന സംഘാടകര്‍.