സുല്‍ത്താന്‍ ബത്തേരി: കരിവള്ളികുന്ന് ഉപതെരഞ്ഞെടുപ്പിലെ വിജയത്തില്‍ ആഹ്ലാദം പ്രകടിപ്പിച്ച് യു.ഡി.എഫ് നടത്തിയ പ്രകടനത്തിനിടെ എല്‍.ഡി.എഫ്-യു.ഡിഎഫ് സംഘര്‍ഷം. സംഘര്‍ഷത്തില്‍ ഒരു കോണ്‍ഗ്രസ് പ്രവര്‍ത്തകനും ഒരു ഡി.വൈ.എഫ്‌ഐ പ്രവര്‍ത്തകനും പരുക്കേറ്റു.
ആഹ്ലാദ പ്രകടനം നടത്തുന്നതിന്നിടെ കരിവള്ളിക്കുന്നില്‍വെച്ച് പ്രകടനത്തിന് നേരെ എല്‍.ഡി.എഫ് കല്ലെറിയുകയായിരുന്നുവെന്നാണ് കല്ലേറില്‍ പരുക്കേറ്റ് സ്വകാര്യ ആശുപത്രിയില്‍ ചികിത്സയില്‍ കഴിയുന്ന ഓടപ്പള്ളം താഴത്തുകുടി സാജന്‍ പറയുന്നത്. അതേ സമയം തങ്ങളെ പ്രകോപനമില്ലാതെ മര്‍ദിക്കുകയായിരുന്നെന്നാണ് പരുക്കേറ്റ താലൂക്ക് ആശുപത്രയില്‍ കഴിയുന്ന കരിവള്ളിക്കുന്ന് മണികണ്ഠന്‍ പറയുന്നത്. ഇരുകൂട്ടരും ഏറ്റുമുട്ടിയതോടെ സംഭവസ്ഥലത്ത് പൊലിസെത്തി സ്ഥിതിഗതികള്‍ ശാന്തമാക്കി. ഡിവൈ.എസ്.പിയുടെ നേതൃത്വത്തിലാണ് പൊലിസ് പ്രദേശത്തെ സംഘര്‍ഷത്തിന് അയവുവരുത്തിയത്.