റിയാദ്: സഊദി തൊഴില്‍ മന്ത്രാലയം നടപ്പാക്കുന്ന വേതന സുരക്ഷാ നിയമത്തിന്റെ അടുത്തഘട്ടം നാളെ മുതല്‍ പ്രാബല്യത്തില്‍. പതിനൊന്നാം ഘട്ടമാണ് ഇപ്പോള്‍ നടപ്പാക്കുന്നത്. 60 മുതല്‍ 79 വരെ തൊഴിലാളികളുള്ള സ്ഥാപനങ്ങള്‍ക്കാണ് നിയമം ബാധകമാവുക. 80ന് മുകളില്‍ തൊഴിലാളികളുള്ള സ്ഥാപനങ്ങള്‍ നേരത്തേ നിയമത്തിന്റെ പരിധിയില്‍ വന്നിരുന്നു. 7,021 സ്ഥാപനങ്ങളിലുള്ള 4,81,097 തൊഴിലാളികള്‍ക്കാണ് ഈ ഘട്ടത്തില്‍ നിയമത്തിന്റെ പരിരക്ഷ ലഭിക്കുക.
നിയമം പ്രാബല്യത്തില്‍ വരുന്നതോടെ നിശ്ചിത സമയത്ത് വേതനം നല്‍കിയില്ലെങ്കില്‍ തൊഴിലുടമ 3,000 റിയാല്‍ വരെ പിഴ അടയ്‌ക്കേണ്ടിവരും. മൂന്നുമാസത്തിലേറെ വൈകിയാല്‍ സ്ഥാപനത്തിനുള്ള തൊഴില്‍ മന്ത്രാലയത്തിന്റെ സേവനം നിര്‍ത്തലാക്കുകയും തൊഴിലാളിക്ക് കമ്പനിയുടെ അനുമതിയില്ലാതെ സ്‌പോണ്‍സര്‍ഷിപ്പ് മാറുകയും ചെയ്യാം.
ശമ്പളം ഉള്‍പ്പെടെയുള്ള ആനുകൂല്യങ്ങള്‍ ബാങ്ക് വഴി നല്‍കുക, ഓരോ ജോലിക്കുമുള്ള ശമ്പളം നിശ്ചയിക്കുക, സേവന, വേതന വിവരങ്ങള്‍ തൊഴില്‍ മന്ത്രാലയത്തിന് നല്‍കുക തുടങ്ങിയ നടപടികളാണ് നിയമത്തിന്റെ ഭാഗമായുള്ള നിബന്ധനകള്‍. തൊഴിലാളികളുടെ വ്യക്തിഗത, തൊഴില്‍ വിവരങ്ങള്‍ മന്ത്രാലയം ആവശ്യപ്പെടുന്ന ഡാറ്റാബേസില്‍ നല്‍കുകയും വേണം.