ലണ്ടന്‍: ബ്രിട്ടന്‍ യൂറോപ്യന്‍ യൂനിയന്‍ വിടുന്നതുമായി ബന്ധപ്പെട്ട് അനിശ്ചിതത്വം നിലനില്‍ക്കുന്നതിനിടെ ബ്രിട്ടിഷ് വോട്ടര്‍മാര്‍ ഇന്ന് പുതിയ പ്രധാനമന്ത്രിയെ തെരഞ്ഞെടുക്കും. ഉടമ്പടിയില്ലാതെ തന്നെ ബ്രെക്‌സിറ്റ് നടത്തുമെന്നു പറയുന്ന പ്രധാനമന്ത്രി ബോറിസ് ജോണ്‍സന്‍ നയിക്കുന്ന കണ്‍സര്‍വേറ്റീവ് പാര്‍ട്ടി വിജയിക്കുമെന്നാണ് അഭിപ്രായ സര്‍വേകള്‍ നല്‍കുന്ന സൂചന.
ബ്രെക്‌സിറ്റ് നടത്താന്‍ ടോറി പാര്‍ട്ടിക്കേ കെല്‍പുള്ളൂവെന്ന് ബോറിസ് ജോണ്‍സന്‍ ഇന്നലെ അവസാനവട്ട പ്രചാരണത്തിലും ആവര്‍ത്തിച്ചു.
അതേസമയം പ്രതീക്ഷയ്ക്ക് വോട്ട് ചെയ്യുക എന്നാഹ്വാനം ചെയ്യുന്ന ലേബര്‍ പാര്‍ട്ടിയുടെ ജെറമി കോര്‍ബിന്‍ ടോറികളുടെ നെഗറ്റീവ് സമീപനത്തെ കടന്നാക്രമിച്ചു.
മറ്റൊരു സ്ഥാനാര്‍ഥിയായ ലിബ് ഡെം നേതാവ് ജോ സ്വിന്‍സണ്‍ താന്‍ പ്രധാനമന്ത്രിയായാല്‍ ബ്രെക്‌സിറ്റ് നിര്‍ത്തിവയ്ക്കുമെന്നാണ് വോട്ടര്‍മാരോടു പറയുന്നത്. എസ്.എന്‍.പിയുടെ നിക്കോള സ്റ്റര്‍ജനും മല്‍സരരംഗത്തുണ്ട്. ഇന്നു രാവിലെ ഏഴിന് തുടങ്ങുന്ന പോളിങ് രാത്രി 10 മണിവരെ തുടരും.
പുതുതായി തെരഞ്ഞെടുക്കപ്പെടുന്ന എം.പിമാര്‍ ബ്രെക്‌സിറ്റ് എങ്ങനെ വേണമെന്ന് തീരുമാനിക്കും. 650 അംഗ പാര്‍ലമെന്റില്‍ കണ്‍സര്‍വേറ്റീവ് പാര്‍ട്ടിക്ക് 321 സീറ്റെങ്കിലും ലഭിച്ചാല്‍ ബോറിസ് ജോണ്‍സന്‍ നേരത്തെ പ്രഖ്യാപിച്ച പോലെ 2020 ജനുവരി 31ന് ബ്രിട്ടന്‍ യൂറോപ്യന്‍ യൂനിയന്‍ വിടും. എന്നാല്‍ കണ്‍സര്‍വേറ്റീവ് പാര്‍ട്ടിക്ക് ഭൂരിപക്ഷം ലഭിച്ചില്ലെങ്കില്‍ ജോണ്‍സന്‍ രാജിവയ്ക്കുകയോ ന്യൂനപക്ഷ സര്‍ക്കാര്‍ ഉണ്ടാക്കാന്‍ ശ്രമിക്കുകയോ ചെയ്യും.
കണ്‍സര്‍വേറ്റീവ് പാര്‍ട്ടിക്ക് സര്‍ക്കാരുണ്ടാക്കാന്‍ സാധിക്കുന്നില്ലെങ്കില്‍ ലേബര്‍ പാര്‍ട്ടി മുന്നോട്ടുവരും. ജെറമി കോര്‍ബിന്‍ പ്രധാനമന്ത്രിയാവുകയും ചെയ്യും.
എന്നാല്‍ ജെറമി കോര്‍ബിനാണ് നേതാവെങ്കില്‍ പിന്തുണയ്ക്കില്ലെന്ന് ലിബ് ഡെം നേതാവ് ജോ സ്വിന്‍സണ്‍ പ്രഖ്യാപിച്ചിട്ടുള്ളതിനാല്‍ കോര്‍ബിന്‍ രാജിവച്ച് പുതിയ നേതാവിനെ കണ്ടെത്തേണ്ടതായി വരും. അല്ലെങ്കില്‍ പ്ലെയ്ഡ് സിംറു, ഗ്രീന്‍സ് പോലുള്ള ചെറു പാര്‍ട്ടികളുടെ പിന്തുണയോടെ സര്‍ക്കാരുണ്ടാക്കാന്‍ അദ്ദേഹം ശ്രമിക്കും.