കാടുകള്‍ക്ക് പ്രണയം പൊട്ടുന്ന ദിവസങ്ങളില്‍

കിലുക്കിച്ചെടികളുടെ ഇലഗോവണികളിലൂടെ ഇറങ്ങി
അനേകം ഒറ്റയടിവഴികള്‍ ചേര്‍ന്ന്
ശലഭങ്ങളുടെ ഒരു പെരുവഴി കുതിക്കും
മലകളുടെ തലച്ചോറിലോ
മരങ്ങളുടെ കാതലിലോ
കൊത്തിവച്ചിരിക്കാം അതിന്റെ രഹസ്യം
മലവെള്ളപ്പാച്ചിലെന്ന്
ശലഭങ്ങളുടെ നിറവിനെ തള്ളി
കാടുകളുടെ പ്രണയഞരമ്പ്
വയലുകള്‍ക്കും ഗ്രാമങ്ങള്‍ക്കും
റോഡുകള്‍ക്കും മുകളില്‍ തെളിഞ്ഞു വരും.
പിടിക്കാന്‍ കിട്ടാത്ത ദേഷ്യത്തില്‍
അതിനു പിന്നാലെയോടും സ്‌കൂള്‍ കുട്ടികള്‍
കുറ്റിച്ചെടിയൊടിച്ച് അടിച്ചുവീഴ്ത്തും...
ഒന്ന്... രണ്ട്... മൂന്ന്...
കൊല്ലുന്നതിന്റെ രസം ഓടിക്കൊണ്ടിരിക്കും.
എന്നാലോ
ചത്തുവീണവയെ തിരിഞ്ഞുനോക്കാതെ
നിമിഷം പോലും മടിച്ചുനില്‍ക്കാതെ
ശലഭകോടികളെ വഹിച്ച് ഒഴുകിക്കൊണ്ടിരിക്കും
ദിവസങ്ങളോളം ആ ജീവപാത
താഴ്‌വരയില്‍ കാടിന്റെ പ്രേമമെത്തിക്കുവാന്‍...