പാലക്കാട്: ബി ജെ പി സംസ്ഥാന വ്യാപകമായി നടത്തിയ ഹര്‍ത്താല്‍ ജില്ലയില്‍ ഭാഗികം. പാലക്കാട് കെ.എസ്.ആര്‍.ടി.സി ഡിപ്പോയില്‍ നിര്‍ത്തിയിട്ടിരുന്ന മൂന്ന് ബസുകള്‍ക്ക് നേരെ കല്ലെറിഞ്ഞ തകര്‍ത്ത സംഭവം ഒഴിച്ചാല്‍ ഹര്‍ത്താല്‍ പൊതുവേ സമാധാനപരമായിരുന്നു. കെ എസ് ആര്‍ ടി സി, സ്വകാര്യബസുകള്‍ ഓടിയില്ല. അതേ സമയം സ്വകാര്യവാഹനങ്ങള്‍ നിരത്തിലിറങ്ങി. മെഡിക്കല്‍ സ്റ്റോര്‍ ഒഴികെ എല്ലാ കടകമ്പോളങ്ങളും അടഞ്ഞു കിടന്നു. ഹര്‍ത്താലിനെ തുടര്‍ന്ന് ദൂര ദേശങ്ങളില്‍ നിന്ന് വന്നവര്‍ കെ.എസ്.ആര്‍.ടി.സി ബസ് സ്റ്റാന്‍ഡിലും റെയില്‍വേ സ്റ്റേഷനിലും കുടുങ്ങി.
സമീപ പ്രദേശങ്ങളിലുള്ളവരെ പൊലിസ് വാഹനത്തില്‍ വീടുകളിലെത്തിച്ചുവെങ്കിലും ദൂരദിക്കുകളിലേക്ക് പോകേണ്ടവര്‍ക്ക് വൈകീട്ട് ആറ് വരെ ഭക്ഷണം പോലും കിട്ടാതെ റെയില്‍വേ സ്റ്റേഷനുകളിലും ബസ് സ്റ്റാന്‍ഡിലും നില്‍ക്കുന്നദയനീയകാഴ്ച കാണാമായിരുന്നു. ഇവരാകട്ടെ ഹര്‍ത്താലിനെതിരെ ശക്തമായ പ്രതിഷേധവും രേഖപ്പെടുത്തി.
സര്‍ക്കാര്‍ ഓഫീസുകളും പൊതുമേഖലാ സ്ഥാപനങ്ങളും കഞ്ചിക്കോട് വ്യവസായ മേഖലയും ഭാഗികമായാണ് പ്രവര്‍ത്തിച്ചത്. ഹര്‍ത്താല്‍ അനുകൂലികള്‍ താലൂക്ക് കേന്ദ്രങ്ങളില്‍ നാമജപ പ്രതിഷേധം നടത്തി. പാലക്കാട് വടക്കന്തറയില്‍ നിന്നാരംഭിച്ച നാമജപ പ്രതിഷേധ ജാഥ ശകുന്തള ജംഗ്ഷനില്‍ സമാപിച്ചു. ബി.ജെ.പി ആഹ്വാനം ചെയ്ത ഹര്‍ത്താല്‍ ജനങ്ങളെ വലച്ചു. കടകമ്പോളങ്ങള്‍ അടഞ്ഞുകിടന്നു. വാഹനങ്ങള്‍ ഓടിയില്ല' വിവിധ ദേശാകൃത ബാങ്കുകള്‍ പ്രവര്‍ത്തിച്ചിരുന്നെങ്കിലും ഹര്‍ത്താല്‍ അനുകൂലിക് അടപ്പിച്ചു. എന്നാല്‍ സഹകരണ ബാങ്കുകള്‍, നഗരസഭ ഓഫിസും സാധാരണ പോലെ പ്രവര്‍ത്തിച്ചിരുന്നെങ്കിലും ഹാജര്‍ നില കുറവായിരുന്നു. റെയില്‍വേ സ്റ്റേഷനില്‍ പതിവില്‍ കൂടുതല്‍ തിരക്ക് അനുഭവപെട്ടു.