കൊല്‍ക്കത്ത: ജയ് ശ്രീറാം വിളിച്ച് ക്രിസ്ത്യന്‍ ചര്‍ച്ചിനു നേരെ ബോംബാക്രമണം നടത്തിയ സംഭവത്തില്‍ മൂന്ന് ആര്‍.എസ്.എസ്- ബി.ജെ.പി പ്രവര്‍ത്തകര്‍ അറസ്റ്റില്‍.

ഈസ്റ്റ് മിഡ്‌നാപൂര്‍ ജില്ലയില്‍ പുലര്‍ച്ചെ രണ്ടു മണിക്കാണ് സംഭവം നടന്നത്. ജയ് ശ്രീറാം വിളിയോടെ ഒരു സംഘം പള്ളിയുടെ ഭാഗത്തേക്ക് ഓടിയടുക്കുകയും ബോംബെറിയുകയും ചെയ്തു. ഇതോടെ പള്ളിക്കകത്തുണ്ടായിരുന്നു ഓടിരക്ഷപ്പെട്ടു. ഈ സമയത്ത് ഇവര്‍ അകത്തുകയറുകയും പള്ളിമുറ്റത്ത് ഉണ്ടായിരുന്ന കാര്‍ അടക്കം നിരവധി സാധനങ്ങള്‍ നശിപ്പിക്കുകയും ചെയ്തു.

സംഭവത്തില്‍ ആര്‍.എസ്.എസ്- ബി.ജെ.പി പ്രവര്‍ത്തകരായ എട്ടു പേര്‍ക്കെതിരെ ചര്‍ച്ചിലെ പാസ്റ്റര്‍ അലോക് ഘോഷ് പരാതി നല്‍കി. ഇതില്‍ മൂന്നുപേരെയാണ് പൊലിസ് അറസ്റ്റ് ചെയ്തത്.

ഒഡിഷ, മധ്യപ്രദേശ്, ഡല്‍ഹി സംസ്ഥാനങ്ങളിലും സമാനമായ സംഭവം റിപ്പോര്‍ട്ട് ചെയ്തിരുന്നു. പശ്ചിമബംഗാളില്‍ ഇതാദ്യത്തെ സംഭവമാണ്.

ചര്‍ച്ച് കെട്ടിടത്തിനു പുറത്ത് രണ്ട് ബോംബ് പൊട്ടിച്ചുവെന്നാണ് റിപ്പോര്‍ട്ട്. ഉള്ളിലുണ്ടായിരുന്നവര്‍ ഓടിയപ്പോള്‍, സംഘം അകത്തുകടന്ന് കസേരകളും മേശകളും മൈക്രോഫോണുകളും നശിപ്പിച്ചു. പുറത്ത് നിര്‍ത്തിയിട്ടിരുന്ന പാസ്റ്ററിന്റെ കാറിനു നേരെയും അക്രമമുണ്ടായി.

അക്രമികള്‍ക്ക് പാര്‍ട്ടിയുമായി ബന്ധമില്ലെന്ന് ജില്ലാ ബി.ജെ.പി നേതാക്കള്‍ പ്രതികരിച്ചു.