കോട്ടയം: കുട്ടനാടിന്റെ പ്രളയ പ്രതിരോധനത്തിന് സ്വീകരിക്കേണ്ട പ്രതിരോധ നടപടികളെക്കുറിച്ച് പഠിക്കാന്‍ രാജ്യാന്തര തലത്തില്‍ വിദഗ്ധര്‍ ഉള്‍പ്പെടുന്ന ഏജന്‍സിയെ നിയോഗിക്കാന്‍ തീരുമാനിച്ചതായി മന്ത്രി ജി. സുധാകരന്‍. കാലാവസ്ഥ വ്യതിയാനവും ആഗോളതാപനവും മൂലം കടല്‍ ജലനിരപ്പ് ഉയരുന്നത് കുട്ടനാടിനെ നേരിട്ട് ബാധിക്കും. ഇക്കാര്യവും പഠനവിധേയമാക്കേണ്ടതാണെന്ന് മന്ത്രി പറഞ്ഞു.
എം.ജി സര്‍വകലാശാല സ്‌കൂള്‍ ഓഫ് എന്‍വയണ്‍മെന്റല്‍ സയന്‍സസ് വിഭാഗവും ഡെമോക്രാറ്റിക് ഹ്യൂമന്‍ റൈറ്റ്‌സ് ആന്‍ഡ് എന്‍വയണ്‍മെന്റല്‍ പ്രോട്ടക്ഷന്‍ ഫോറവുമായി സഹകരിച്ച് സി.എം.എസ് കോളജ് ബോട്ടണി വിഭാഗം സംഘടിപ്പിച്ച കാലാവസ്ഥാ വ്യതിയാനവും കുട്ടനാടിന്റെ ഭാവിയും എന്ന വിഷയത്തിലുള്ള സെമിനാര്‍ ഉദ്ഘാടനം ചെയ്യുകയായിരുന്നു മന്ത്രി. എ.സി റോഡില്‍ വലിയപാലങ്ങള്‍ ഒഴിച്ച് കുട്ടനാടിന്റെ അവാസവ്യവസ്ഥയെ തകരാറിലാക്കുന്ന എല്ലാ കോണ്‍ക്രീറ്റ് നിര്‍മാണങ്ങളും ഒഴിവാക്കണം. അതിനായി പൊതുജനാഭിപ്രായം ഉയരണം. എ.സി കനാല്‍ തുറക്കണമെന്ന ആവശ്യം സര്‍ക്കാര്‍ നടപ്പാക്കുമെന്നും മന്ത്രി അറിയിച്ചു. യു.എന്‍ പഠന റിപ്പോര്‍ട്ടില്‍ നെതര്‍ലന്റ് മാതൃകയുടെ കാര്യം സൂചിപ്പിക്കുന്നുണ്ട്. ഇതിന്റെ പ്രായോഗികമായ എല്ലാ സാധ്യതകളും സര്‍ക്കാര്‍ പരിശോധിക്കും. കുട്ടനാട്ടിലെ കര്‍ഷകര്‍ ഇപ്പോഴും നെല്‍ക്കൃഷിയില്‍ താല്‍പര്യമുള്ളവരാണ്. അല്‍പം പിന്നോക്കം പോയതിന് പിന്നില്‍ സര്‍ക്കാര്‍ ഉദ്യോഗസ്ഥരുടെ അഴിമതിയാണ്. ഏത് പ്രതിസന്ധി ഉണ്ടായാലും അതിനെ ഒരു പരിധിവരെ അതിജീവിക്കാന്‍ കഴിവുള്ളവരാണ് കുട്ടനാട്ടുകാര്‍.കേരളത്തിന്റെ പുനര്‍നിര്‍മാണത്തില്‍ കുട്ടനാടിനെ ഹൃദയഭൂമിയായി മാറ്റാന്‍ ആവശ്യമായ നടപടി സ്വീകരിക്കും. കുട്ടനാട് പാക്കേജ് പരാജയത്തിന് പിന്നില്‍ രാഷ്ട്രീയ ഉദ്യോഗസ്ഥതലമാണ്. പിഴവുകള്‍ ഒഴിവാക്കിയായിരിക്കും പുനര്‍നിര്‍മാണത്തില്‍ പാക്കേജ് നടപ്പാക്കുകയെന്നും മന്ത്രി പറഞ്ഞു. എന്‍വയണ്‍മെന്റല്‍ പ്രേഗ്രാം മാനേജര്‍ ഡോ. ജോണ്‍ സി. മാത്യു വിഷയാവതരണം നടത്തി. എം.ജി യൂനിവേഴ്‌സിറ്റി പ്രൊഫ. സി.ടി അരവിന്ദകുമാര്‍ ചര്‍ച്ചയ്ക്ക് നേതൃത്വം നല്‍കി. സി.എം.എസ് കോളജ് പ്രിന്‍സിപ്പല്‍ ഡോ. റോയി സാം ദാനിയേല്‍ അധ്യക്ഷനായി. മാധ്യമ പ്രവര്‍ത്തകന്‍ ചെറുകര സണ്ണി ലൂക്കോസ് ആമുഖ പ്രസംഗം നടത്തി. അനിയന്‍ മാത്യൂ, ഡോ. ബോസില്‍ ജോര്‍ജ് എന്നിവര്‍ പ്രസംഗിച്ചു.റവ. ജേക്കബ് ജോര്‍ജ്, ഡിജോ കാപ്പന്‍, അഡ്വ. ഫ്രാന്‍സിസ് തോമസ് എന്നിവര്‍ പങ്കെടുത്തു. സെമിനാറില്‍ കുട്ടനാട്ടില്‍ നിന്നുള്ള ജനപ്രതിനിധികളും കര്‍ഷകപ്രമുഖരും ചര്‍ച്ചയില്‍ പങ്കെടുത്തു.