പള്ളിക്കല്‍: പള്ളിക്കല്‍ പഞ്ചായത്തില്‍ ഡെങ്കിപ്പനിയുള്‍പ്പെടെ പകര്‍ച്ചപ്പനി പടര്‍ന്നു പിടിക്കുമ്പോഴും അധികാരികള്‍ മൗനം പാലിക്കുന്നു. പത്ത് മാസം പ്രായമായ കുഞ്ഞുള്‍പ്പെടെ മൂന്ന് പേരാണ് പള്ളിക്കല്‍ മേഖലയില്‍ മാത്രം ഡെങ്കിപനി മൂലം മൂന്നാഴ്ചക്കുള്ളില്‍ മരണമടഞ്ഞത്. പള്ളിക്കല്‍ പ്രാഥമികാരോഗ്യ കേന്ദ്രത്തില്‍ ആവശ്യത്തിന് ഡോക്ടര്‍മാരും ജീവനക്കാരുമില്ലാത്തതിനാലും പകര്‍ച്ചപ്പനിക്കായുള്ള രക്തപരിശോധനാ സൗകര്യമില്ലാത്തതിനാലും നിരവധി രോഗികളാണ് വിവിധ സ്യകാര്യ ക്ലിനിക്കുകളെയും ആശുപത്രികളെയും ആശ്രയിക്കുന്നത്.
ഇത്തരത്തിലുള്ള സ്ഥാപനങ്ങളില്‍ നിന്നും പ്രദേശത്ത് പടര്‍ന്ന് പിടിക്കുന്ന പകര്‍ച്ചവ്യാധികളെ കുറിച്ച് ആരോഗ്യവകുപ്പിന് വിവരം ലഭിക്കുന്നില്ല. എന്നാല്‍ വിവരങ്ങള്‍ ശേഖരിച്ച് ആവശ്യമായ നടപടികള്‍ കൈകൊള്ളാന്‍ ആരോഗ്യവകുപ്പ് ശ്രമിക്കുന്നുമില്ല. ആരോഗ്യവകുപ്പ് അധികൃതരുടെ നേതൃത്വത്തില്‍ ആരാധനാലയങ്ങളിലുള്‍പ്പെടെ പൊതുവേദികളില്‍ ബോധവല്‍ക്കരണ ക്ലാസുകളും ചില വാര്‍ഡുകളില്‍ പൊതു സ്ഥലങ്ങളില്‍ ശചീകരണ പ്രവര്‍ത്തികളും നടത്തിയിരുന്നു. എന്നാല്‍ കഴിഞ്ഞകാലങ്ങളില്‍ നടത്തിയ വാര്‍ഡ് തലത്തില്‍ സ്‌ക്വാഡുകള്‍ രൂപികരിച്ച് വീടുകളില്‍ കയറിയിറങ്ങിയുള്ള ബോധവല്‍കരണങ്ങളും ശുചീകരണ പ്രവര്‍ത്തനങ്ങളും മിക്ക വാര്‍ഡുകളിലും നടത്തിയിട്ടില്ലായെന്ന ആക്ഷേപവും ജനങ്ങള്‍ക്കിടയിലുണ്ട്. ഇനിയെങ്കിലും ഉണര്‍ന്ന് പ്രവര്‍ത്തിക്കാന്‍ ബന്ധപ്പെട്ട അധികാരികള്‍ തയാറാകണമെന്നാണ് നാട്ടുകാര്‍ ആവശ്യപ്പെടുന്നത്.