മാനന്തവാടി: വീടിന് സമീപം കഞ്ചാവ് ചെടി വളര്‍ത്തിയ സംഭവത്തില്‍ മൂന്നുപേര്‍ അറസ്റ്റിലായി. മാനന്തവാടി കല്ലുമൊട്ടംകുന്ന് പുത്തന്‍പുരക്കല്‍ ത്രേസ്യാമ്മ, കൊച്ചുമകന്‍ ഷോണ്‍(22), സുഹൃത്ത് റോഷന്‍ എന്ന ഉണ്ണി(24) എന്നിവരെയാണ് എക്‌സൈസ് അറസ്റ്റ് ചെയ്തത്. 

ഷോണിനെ തിങ്കളാഴ്ച രാത്രിയും റോഷനെ ച്ചൊവ്വാഴ്ച രാവിലെയുമാണ് അറസ്റ്റ് ചെയ്തത്. ത്രേസ്യാമ്മയെ തിങ്കളാഴ്ച സംഭവ സ്ഥലത്ത് നിന്നുതന്നെ പിടികൂടിയിരുന്നു. വീടിന്റെ പുറകുവശത്ത് മൂന്ന് മീറ്ററിലേറെ ഉയരത്തിലുള്ള രണ്ട് കഞ്ചാവു ചെടികളാണ് ഇവര്‍ വളര്‍ത്തിവന്നിരുന്നത്. എക്‌സൈസ് ഇന്റലിജന്‍സിന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ നടത്തിയ പരിശോധനയില്‍ കഞ്ചാവ്‌ചെടി കണ്ടെത്തിയിരുന്നു.
ഇതിനുപുറമെ വീട്ടില്‍ നടത്തിയ പരിശോധനയില്‍ പതിനഞ്ച് ലിറ്റര്‍ വാഷും അഞ്ഞൂറ് മില്ലി നാടന്‍ ചാരായവും കണ്ടെത്തി.
എക്‌സൈസ് ഇന്റലിജന്‍സ് ഇന്‍സ്‌പെക്ടര്‍ എ.ജെ ഷാജി, ഇന്‍സ്‌പെക്ടര്‍ എം.കെ സുനില്‍, ഇന്റലിജന്‍സ് പ്രിവന്റിവ് ഓഫിസര്‍മാരായ കെ.ജെ സന്തോഷ്, കെ രമേഷ്, എം.കെ ഗോപി, എക്‌സൈസ് പ്രിവന്റിവ് ഓഫിസര്‍മാരായ ടി സജീവന്‍, ശശി, വനിത സിവില്‍ ഓഫിസര്‍ സല്‍മ ജോസ് എന്നിവരടങ്ങുന്ന സംഘമാണ് കഞ്ചാവും ചാരായവും പിടികൂടിയത്. ഇവരെ പിന്നീട് കോടതിയില്‍ ഹാജരാക്കി.