കൊച്ചി : 2011 ല്‍ മുതിര്‍ന്ന സിനിമാനടിയെ തട്ടിക്കൊണ്ടുപോകാന്‍ ശ്രമിച്ച കേസിലെ രണ്ടു പ്രതികള്‍ നല്‍കിയ ജാമ്യാപേക്ഷ ഹൈക്കോടതി തള്ളി.
കേസിലെ നാലാം പ്രതി കുന്നത്തുനാട് നോര്‍ത്ത് മഴുവന്നൂര്‍ കൊമ്പനാല്‍ വീട്ടില്‍ എബിന്‍ കുര്യാക്കോസ് (27), അഞ്ചാം പ്രതി മഴുവന്നൂര്‍ വാഴക്കുഴി തടത്തില്‍ ബിബിന്‍ വി. പോള്‍ (27) എന്നിവരുടെ ജാമ്യാപേക്ഷയാണ് ഹൈക്കോടതി തള്ളിയത്.
നേരത്തെ എറണാകുളം അഡി. ചീഫ് ജുഡിഷ്യല്‍ മജിസ്‌ട്രേറ്റ് കോടതിയും ഇവരുടെ ജാമ്യാപേക്ഷ തള്ളിയിരുന്നു.
ഓര്‍ക്കൂട്ട് ഒരു ഓര്‍മക്കൂട്ട് എന്ന ചിത്രത്തില്‍ അഭിനയിക്കാനായി തിരുവനന്തപുരത്ത് നിന്ന് എറണാകുളം സൗത്ത് റെയില്‍വേ സ്റ്റേഷനിലെത്തിയ നടിയെ ടെമ്പോ ട്രാവലറില്‍ പള്‍സര്‍ സുനിയടക്കമുള്ള പ്രതികള്‍ ചേര്‍ന്നു തട്ടിക്കൊണ്ടുപോകാന്‍ ശ്രമിച്ചെന്നാണ് കേസ്.
ഇവരുടെ നീക്കത്തില്‍ സംശയം തോന്നിയ നടി ചലച്ചിത്ര നിര്‍മാതാവുകൂടിയായ ഭര്‍ത്താവിനെ ഫോണില്‍ വിളിച്ചതോടെയാണ് തട്ടിക്കൊണ്ടു പോകാനുള്ള നീക്കം പൊളിഞ്ഞത്. ഇവരെ കുമ്പളത്ത് ഒരു റിസോര്‍ട്ടിനു മുന്‍പില്‍ ഇറക്കിവിട്ട് സംഘം രക്ഷപ്പെടുകയായിരുന്നു.