ലഖ്‌നൗ: ഉത്തര്‍പ്രദേശ് മുഖ്യമന്ത്രി യോഗി ആദിത്യ നാഥിന്റെ ജനപ്രീതി ദിവസംപ്രതി കുറയുന്നതായി പൊളിറ്റിക്കല്‍ സ്റ്റോക്ക് എക്‌സ്‌ചേഞ്ച് പുറത്തുവിട്ട റിപ്പോര്‍ട്ട് വ്യക്തമാക്കുന്നു.
കഴിഞ്ഞ മൂന്നുമാസത്തിനിടയിലാണ് യോഗിയുടെ ജനപ്രീതി വലിയതോതില്‍ കുറഞ്ഞതെന്നും ഇന്ത്യാ ടുഡെയുടെ നേതൃത്വത്തില്‍ നടത്തിയ റിപ്പോര്‍ട്ട് പറയുന്നു. മധ്യപ്രദേശിലും ഛത്തിസ്ഗഡിലും മുഖ്യമന്ത്രിമാരായിരുന്ന ശിവ്്‌രാജ് സിങ് ചൗഹാന്‍, രമണ്‍ സിങ് എന്നിവരേക്കാള്‍, അധികാരമേറ്റെടുത്ത് രണ്ടു വര്‍ഷത്തിനുള്ളില്‍ യോഗിയുടെ ജനപ്രീതി ആറുശതമാനത്തോളം കുറഞ്ഞിരുന്നു.
ലോക്‌സഭാ തെരഞ്ഞെടുപ്പ് അടുത്തിരിക്കെ ഉത്തര്‍പ്രദേശില്‍ ഭരണ വിരുദ്ധ തരംഗം ശക്തമായി എന്നുമാത്രമല്ല ബി.ജെ.പിക്കെതിരേ വലിയതോതിലുള്ള പ്രതിഷേധവും ഉയര്‍ന്നിട്ടുണ്ട്.
ദേശീയ തലത്തില്‍ തന്നെ ബി.ജെ.പിക്ക് ഇത് വലിയ തലവേദനയായി മാറിയിട്ടുണ്ട്.
അധികാരമേറ്റെടുത്ത ശേഷം യോഗിയുടെ ജനപ്രീതി 43 ശതമാനത്തോളമായിരുന്നു. ഇപ്പോഴാകട്ടെ യോഗിയോടുള്ള ജനങ്ങളുടെ താല്‍പര്യം അഞ്ച് ശതമാനത്തില്‍ താഴെയായി കുറഞ്ഞിട്ടുണ്ട്.
അതേസമയം എസ്.പി അധ്യക്ഷനും മുന്‍മുഖ്യമന്ത്രിയുമായ അഖിലേഷ് യാദവിന്റെ ജനപ്രീതി 29 ശതമാനമായി വര്‍ധിച്ചിരിക്കുകയാണ്.