മഞ്ചേരി: കെ.എം മാണി എന്‍.ഡി.എ യില്‍ ചേരുകയാണങ്കില്‍ ബഹുഭൂരിഭാഗം നേതാക്കളും അണികളും കൊഴിഞ്ഞുപോവുമെന്ന് കോണ്‍ഗ്രസ് നേതാവ് ആര്യാടന്‍ മുഹമ്മദ് പറഞ്ഞു. ക്വിറ്റ് ഇന്ത്യാ ദിനത്തോടനുബന്ധിച്ച് മഞ്ചേരിയില്‍ ഡി.സി.സി നടത്തിയ അനുസ്മരണ പരിപാടിക്ക് ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
കോണ്‍ഗ്രസ് നേതൃത്വം നല്‍കുന്ന മുന്നണിയില്‍ നിന്നും വിട്ടുപോയ മാണിക്ക് തന്റെ നിലപാടില്‍ അധികകാലം തുടരാന്‍ കഴിയില്ല. ഒരു മുന്നണിയോടൊപ്പമല്ലാതെ തനിച്ചു നില്‍ക്കാന്‍ കേരള കോണ്‍ഗ്രസിനു ശക്തിയില്ല. അങ്ങിനെ തെരഞ്ഞെടുപ്പിനെ നേരിട്ടാല്‍ ജയിക്കാനും പോവുന്നില്ല.
ഈ വെല്ലുവിളി എന്തുകൊണ്ട് നിയമസഭ തെരഞ്ഞെടുപ്പിന് മുന്‍പ് ഏറ്റെടുക്കാന്‍ അദ്ദേഹം തയാറായില്ല. ഇന്ത്യയില്‍ സ്വാതന്ത്ര്യ സമരത്തിനു നേതൃത്വം നല്‍കുകയും രാജ്യത്തെ നയിക്കുകയും ചെയ്ത പാരമ്പര്യമാണ് കോണ്‍ഗ്രസിനും അതിന്റെ പ്രവര്‍ത്തകര്‍ക്കുമുള്ളത്. മറ്റു പലര്‍ക്കു രാജ്യത്തിന്റെ സ്വാതന്ത്ര്യ സമരത്തെ ഒറ്റു കൊടുത്ത പാരമ്പര്യമാണുള്ളതെന്നും ആര്യാടന്‍ പറഞ്ഞു.