നിലമ്പൂര്‍: റസ്റ്റോറന്റിനുള്ള അനുമതിയുടെ മറവില്‍ ചീങ്കണ്ണിപ്പാലിയിലെ വിവാദ തടയണയ്ക്കു കുറുകെ പി.വി അന്‍വര്‍ എം.എല്‍.എയുടെ ഭാര്യാപിതാവ് റോപ് വേ കെട്ടിയ സംഭവത്തില്‍ തദ്ദേശ സ്വയംഭരണ സ്ഥാപനങ്ങളുടെ ഓംബുഡ്‌സ്മാന്‍ കേസെടുത്തു. നിലമ്പൂര്‍ സ്വദേശി എം.പി വിനോദ് നല്‍കിയ പരാതിയിലാണ് ഓംബുഡ്‌സ്മാന്‍ ജസ്റ്റിസ് കെ.കെ ദിനേശന്‍ കേസെടുത്തത്.
എം.എല്‍.എയുടെ ഭാര്യാപിതാവ് കോഴിക്കോട് നടുവണ്ണൂര്‍ ഹഫ്‌സ മഹല്‍ സി.കെ അബ്ദുല്‍ ലത്വീഫ്, ഊര്‍ങ്ങാട്ടിരി പഞ്ചായത്ത് സെക്രട്ടറി, പഞ്ചായത്ത് ഡെപ്യൂട്ടി ഡയരക്ടര്‍ മലപ്പുറം എന്നിവര്‍ക്കു നോട്ടീസയക്കാനും ഓംബുഡ്‌സ്മാന്‍ ഉത്തരവിട്ടു. ഊര്‍ങ്ങാട്ടിരി പഞ്ചായത്തിലെ ചീങ്കണ്ണിപ്പാലിയില്‍ വനത്തിലേക്കൊഴുകുന്ന കാട്ടരുവിക്കു കുറുകെ കെട്ടിയ തടയണ പൊളിച്ചുനീക്കാന്‍ മലപ്പുറം കലക്ടര്‍ നേരത്തെ ഉത്തരവിട്ടിരുന്നു. ഇതോടെയാണ് സി.കെ അബ്ദുല്‍ ലത്വീഫ് ഊര്‍ങ്ങാട്ടിരി പഞ്ചായത്തില്‍നിന്നു റസ്റ്റോറന്റ് കം ലോഡ്ജിങ് കെട്ടിടം പണിയാന്‍ പെര്‍മിറ്റ് നേടിയ ശേഷം തടയണയ്ക്കു കുറുകെ റോപ് വേ നിര്‍മിച്ചത്.
ഇക്കാര്യം ചൂണ്ടിക്കാട്ടി 2017 മെയ് 18ന് ഊര്‍ങ്ങാട്ടിരി പഞ്ചായത്ത് സെക്രട്ടറിക്കു പരാതി നല്‍കിയെങ്കിലും നിയമവിരുദ്ധമായി കെട്ടിയ റോപ് വേ പൊളിച്ചുനീക്കാന്‍ നടപടിയുണ്ടായില്ല. റോപ് വേ പണിയാന്‍ നിയമവിരുദ്ധമായി സൗകര്യം ചെയ്തുകൊടുത്ത പഞ്ചായത്ത് സെക്രട്ടറിക്കെതിരേ നടപടിയാവശ്യപ്പെട്ടു മലപ്പുറം പഞ്ചായത്ത് ഡെപ്യൂട്ടി ഡയരക്ടര്‍ക്കു പരാതി നല്‍കിയെങ്കിലും ഒരു നടപടിയുമുണ്ടായില്ല. ഇതോടെയാണ് ഇക്കാര്യങ്ങള്‍ ചൂണ്ടിക്കാട്ടി തദ്ദേശ സ്വയംഭരണ സ്ഥാപനങ്ങള്‍ക്കായുള്ള ഓംബുഡ്‌സ്മാനെ സമീപിച്ചത്.
ഉരുള്‍പൊട്ടലിനെ തുടര്‍ന്നു കോഴിക്കോട് കലക്ടര്‍ അടച്ചുപൂട്ടിയ പി.വി അന്‍വര്‍ എം.എല്‍.എയുടെ കക്കാടംപൊയിലിലെ വിവാദ വാട്ടര്‍തീം പാര്‍ക്കില്‍നിന്ന് ഒന്നര കിലോമീറ്റര്‍ അകലെയാണ് ചീങ്കണ്ണിപ്പാലിയിലെ തടയണയും ഇതിനു കുറുകെ മൂന്നു മലകളെ ബന്ധിപ്പിച്ചുള്ള പണിത റോപ് വേയും. വനഭൂമിയോടു ചേര്‍ന്ന് റോപ് വേയും ടൂറിസം പദ്ധതിയും വരുന്നതു വനത്തെയും വന്യജീവികളെയും ദോഷകരമായി ബാധിക്കുമെന്നു കാണിച്ച് നേരത്തെ നിലമ്പൂര്‍ നോര്‍ത്ത് ഡി.എഫ്.ഒ പെരിന്തല്‍മണ്ണ സബ് കലക്ടര്‍ക്കു റിപ്പോര്‍ട്ട് നല്‍കിയിരുന്നു.