മലമ്പുഴ: അണക്കെട്ടിന്റെ സംഭരണശേഷിയിലും ഡാമിലേയ്ക്കു വരുന്ന നീരൊഴുക്കിലും വന്‍ കുറവ് വന്നത് കര്‍ഷകരെ ആശങ്കയിലാഴ്ത്തുന്നു. ഇതിനാല്‍ കുടിവെള്ള വിതരണത്തിനും കൃഷി ആവശ്യത്തിനും കഴിച്ചുള്ള ജലവിതരണത്തിന് വ്യക്തമായ പഠനം നടത്തിവേണം ജലവിതരണം നടത്തേണ്ടതെന്ന് ജില്ലയിലെ കാര്‍ഷിക-പരിസ്ഥിതി-സാമൂഹ്യ സംഘടനാ പ്രവര്‍ത്തകരുടെ ആവശ്യം ശക്തമാവുന്നുണ്ട്.
കുടിവെള്ള ഉപയോഗം ഓരോ വര്‍ഷവും കൂടിവരികയും കൃഷിയിടങ്ങള്‍ ചുരുങ്ങി കൊണ്ടിരിക്കുകയും ചെയ്യുന്ന സാഹചര്യത്തില്‍ കൃഷിക്ക് മതിയായ തോതില്‍ വെള്ളം ലഭിക്കാതെ ഉണങ്ങി നശിക്കുകയാണ്. ജില്ലയില്‍ വളര്‍ന്നുവരുന്ന വ്യവസായങ്ങള്‍ക്ക് ആവശ്യാനുസരണം ഡാമില്‍നിന്ന് വെള്ളം കൊടുക്കുന്നതിനാലാണ് കുടിവെള്ളത്തിന് തടസം വരാനും കൃഷിയ്ക്ക് വെള്ളം ലഭിക്കാതെ നശിക്കാനും കാരണമാവുന്നത്.
ഒന്നാം വിളയ്ക്കായി കൃഷിയിറക്കുന്നതിനും അവസാനസമയത്തും ഇരുപത് ദിവസത്തേയ്ക്ക് വെള്ളം ആവശ്യമായി വരാറുണ്ട്. രണ്ടാം വിളയ്ക്ക് 130 ദിവസം മൂപ്പുള്ള വിത്ത് ഉപയോഗിക്കുന്നത് കൊണ്ട് മലമ്പുഴഡാമില്‍ നിന്നും നൂറുദിവസത്തില്‍ കൂടുതല്‍ (ഫെബ്രുവരി 15 വരെ) വെള്ളം ആവശ്യമാണ്. 1963ലെ കേന്ദ്ര ഡിഫന്‍സ് നിയമത്തെ ലംഘിച്ച് മലമ്പുഴ ഡാമിന്റെ വൃഷ്ടി പ്രദേശങ്ങളില്‍ നടക്കുന്ന കെട്ടിട നിര്‍മാണ പ്രവര്‍ത്തനങ്ങള്‍ ഉടന്‍ നിര്‍ത്തി വെയ്ക്കണമെന്നുള്ള കര്‍ഷകരുടെ ആവശ്യം ശക്തമാവുകയാണ്.