കൊല്ലം: വാര്‍ത്തകളെടുക്കാന്‍ വരുന്ന മാധ്യമപ്രവര്‍ത്തകരെ തടയുന്നത് ജനാധിപത്യത്തെ ശാക്തീകരിക്കില്ലെന്നും കോടതി റിപ്പോര്‍ട്ടിങ് ജനങ്ങള്‍ക്ക് അറിയാന്‍ അവകാശമുണ്ടെന്നും വനംമന്ത്രി കെ. രാജു പറഞ്ഞു. കേരളശബ്ദം സ്ഥാപകനായിരുന്ന ആര്‍. കൃഷ്ണസ്വാമി റെഡ്യാരുടെ സ്മരണക്കായി ഏര്‍പ്പെടുത്തിയ ആര്‍. കൃഷ്ണസ്വാമി പത്രപ്രവര്‍ത്തക അവാര്‍ഡ് കേരളകൗമുദി ന്യൂസ് എഡിറ്റര്‍ വി.എസ് രാജേഷിന് സമ്മാനിക്കുകയായിരുന്നു മന്ത്രി. ജനാധിപത്യം നിലനില്‍ക്കുന്നതിന്റെ അടിസ്ഥാനഘടകങ്ങളിലൊന്നാണ് മാധ്യമങ്ങള്‍. കോടതികളില്‍ നടക്കുന്ന വാദങ്ങള്‍ ജനത്തിന് അറിയാന്‍ അവകാശമുണ്ട്. മാധ്യമങ്ങളിലൂടെയാണ് ഈ വിവരങ്ങള്‍ ജനം അറിയുന്നത്. കോടതികളില്‍ വ്യത്യസ്ത വാദഗതികള്‍ വരും. സ്വന്തം കക്ഷിക്കുവേണ്ടി അഭിഭാഷകര്‍ ചില വസ്തുകള്‍ മറച്ചുവച്ചെന്നു വരാം. ഇക്കാര്യത്തില്‍ ജഡ്ജിയുടെ കമന്റടക്കം ജനങ്ങള്‍ അറിയുന്നത് മാധ്യമങ്ങളിലൂടെയാണ്. അതാണ് ജനാധിപത്യത്തെ പൂര്‍ണതയിലൊത്തിക്കുന്നതെന്നും മന്ത്രി പറഞ്ഞു.

പ്രസ്‌ക്ലബ്ബ് പ്രസിഡന്റ് സി. വിമല്‍കുമാര്‍ അധ്യഷത വഹിച്ചു. അവാര്‍ഡ് ജഡ്ജിങ് കമ്മിറ്റി ചെയര്‍മാന്‍ പി. കേശവന്‍നായര്‍ ആര്‍. കൃഷ്ണസ്വാമി റെഡ്യാര്‍ അനുസ്മരണവും അവാര്‍ഡ് വിലയിരുത്തലും നടത്തി. വി.എസ് രാജേഷ് മറുപടി പ്രസംഗം നടത്തി. കേരളശബ്ദം എക്‌സിക്യൂട്ടീവ് എഡിറ്റര്‍ മധു ബാലകൃഷ്ണന്‍,പ്രസ് ക്ലബ്ബ് സെക്രട്ടറി ഡി. ജയകൃഷ്ണന്‍ എന്നിവര്‍ സംസാരിച്ചു. ചടങ്ങില്‍ വിമലാ രാജകൃഷ്ണന്‍ എഴുതിയ 'വാതില്‍പഴുതിലൂടെ'പുസ്തകവും പ്രസ് ക്ലബ്ബ് ഡയറക്ടറിയും വെബ്‌സൈറ്റും മന്ത്രി പ്രകാശനം ചെയ്തു.