തൃശൂര്‍: വീട്ടിലേക്ക് പോകണമെന്ന് ആവശ്യപ്പെട്ടതിനെ തുടര്‍ന്ന് ഭാര്യയെ ക്രൂരമായി ആക്രമിച്ച സംഭവത്തിൽ ഭര്‍ത്താവ് അറസ്റ്റില്‍. കുറ്റിച്ചിറ വെട്ടിക്കുഴി സ്വദേശിയായ ഡെറിനെയാണ് വെള്ളിക്കുളങ്ങര ഇൻസ്പെക്ടർ കൃഷ്ണൻ കെയും സംഘവും അറസ്റ്റ് ചെയ്തത്. മദ്യപിച്ചെത്തിയ ഇയാൾ ഭാര്യയെ ആക്രമിക്കുകയും കൊല്ലാൻ ശ്രമിക്കുകയും ചെയ്തതായി പോലീസ് അറിയിച്ചു.

യുവതിയെ വീട്ടിനകത്തുവച്ച് ഇയാൾ മുഖത്തടിച്ച് കഴുത്തിന് ഞെക്കി പിടിച്ച് അടുക്കളയിലേക്ക് തള്ളിക്കൊണ്ടുപോയി. അടുക്കളയിൽ തിളയ്ക്കുന്ന കഞ്ഞിയിലേക്ക് മുഖം മുക്കിപ്പിടിക്കുകയും ചെയ്തു. ആക്രമണത്തിൽ യുവതിക്ക് ഗുരുതരമായി പരിക്കേറ്റിട്ടുണ്ട്. ചാലക്കുടി താലൂക്ക് ആശുപത്രിയിൽ യുവതി ചികിത്സയിലാണ്.

സംഭവത്തിനു ശേഷം ഒളിവിൽ പോയ ഡെറിനെ തൃശ്ശൂർ റൂറൽ ജില്ലാ പോലീസ് മേധാവി ബി. കൃഷ്ണകുമാർ ഐപിഎസിന് കിട്ടിയ രഹസ്യ വിവരത്തിന്റെ അടിസ്ഥാനത്തിൽ പിടികൂടി. ചായ്പാൻകുഴി എന്ന സ്ഥലത്ത് വെച്ചാണ് വെള്ളിക്കുളങ്ങര ഇൻസ്പെക്ടർ കൃഷ്ണൻ കെ, സബ്ബ് ഇൻസ്പെക്ടർ സുനിൽകുമാർ, സീനിയർ സിവിൽ പോലീസ് ഓഫീസർ ഷാജു കെ.ഒ, സിവിൽ പോലീസ് ഓഫീസർ അജിത് കുമാർ കെ സി, ഹോം ഗാർഡ് പ്രദീപ് എന്നിവർ ചേർന്ന് ഇയാളെ അറസ്റ്റ് ചെയ്തത്.

വെള്ളിക്കുളങ്ങര, അതിരപ്പിള്ളി സ്റ്റേഷനുകളിൽ അടിപിടി കേസുകളിലും, വധശ്രമ കേസുകളിലും പ്രതിയായ ഡെറിനൊപ്പം നിരവധി ക്രിമിനൽ കേസുകൾ നിലനില്ക്കുന്നു. അതിനിടെ, അടുത്തിടെ സ്വന്തം സഹോദരിയെ ആക്രമിച്ച കേസിലും ഇയാൾ പ്രതിയാണെന്ന് പോലീസ് വ്യക്തമാക്കി.