ആലപ്പുഴ: കയര്‍ത്തൊഴിലാളികളുടെ സര്‍ക്കാര്‍ കൂലിവിഹിതം കുടിശിക ഓണത്തിന് മുമ്പ് നല്‍കാന്‍ തയ്യാറാകണമെന്നും അല്ലാത്തപക്ഷം തൊഴിലാളികളെ സംഘടിപ്പിച്ച് കയര്‍ പ്രൊജക്ട് ഓഫീസുകള്‍ക്ക് മുമ്പില്‍ പട്ടിണി സമരം നടത്തുമെന്നും ഐ.എന്‍.ടി.യു.സി സംസ്ഥാന പ്രസിഡന്റ് ആര്‍.ചന്ദ്രശേഖരന്‍ പറഞ്ഞു.
കയര്‍തൊഴിലാളികളുടെ മിനിമം കൂലി പദ്ധതി പ്രകാരം യു.ഡി.എഫ് സര്‍ക്കാര്‍ നടപ്പാക്കിയ സര്‍ക്കാര്‍ വിഹിതം കൂലി കഴിഞ്ഞ 11 മാസക്കാലമായി ഇടത് സര്‍ക്കാര്‍ നല്‍കുന്നില്ല. കയര്‍തൊഴിലാളികളുടെ പേരില്‍ പട്ടിണി സമരം നടത്തി അധികാരത്തില്‍ വന്ന ഇടതുമുന്നണി കയര്‍ മേഖലയില്‍ ജി.എസ്.ടി ഏര്‍പ്പെടുത്താന്‍ കേന്ദ്ര സര്‍ക്കാരിന് കൂട്ടുനിന്നും അസംസ്‌കൃത വസ്തുക്കളുടെ വിലവര്‍ദ്ധനവ് തടയുവാന്‍ നല്‍കി വന്നിരുന്ന ചകിരി സബ്‌സിഡി നിര്‍ത്തലാക്കിയും കയര്‍മേഖലയെ പൂര്‍ണ സ്തംബനത്തിലേക്ക് തള്ളിവിട്ടിരിക്കുകയാണെന്ന് അദ്ദേഹം കുറ്റപ്പെടുത്തി. ഐ.എന്‍.ടി.യു.സി സംസ്ഥാന കമ്മറ്റിയുടെ നേതൃത്വത്തില്‍ നടന്നുവരുന്ന സമരപ്രഖ്യാപന ജാഥയുടെ സ്വീകരണ സമ്മേളനത്തില്‍ ഹരിപ്പാട്ട് സംസാരിക്കുകയായിരുന്നു അദ്ദേഹം.
യോഗം എ.ഐ.സി.സി അംഗം സേനാപതി വേണു ഉദ്ഘാടനം ചെയ്തു. ഐ.എന്‍.ടി.യു.സി ജില്ലാ പ്രസിഡന്റ് എന്‍.ഹരിദാസ് അദ്ധ്യക്ഷത വഹിച്ചു. ബി.ജെ. ജോസഫ്, അഡ്വ.സുബോധന്‍, കൃഷ്ണവേണി ശര്‍മ്മ, എ.കെ.രാജന്‍, ജി.ബൈജു, ബാബുജോര്‍ജ്ജ്, ത്രിവിക്രമന്‍തമ്പി, ജോണ്‍തോമസ്, എം.എം. ബഷീര്‍, എം.കെ.വിജയന്‍, എസ്.രാജേന്ദ്രക്കുറുപ്പ്, എസ്.ദീപു, സുരേന്ദ്രനാഥ്, ജേക്കബ് തമ്പാന്‍, അഡ്വ.ഷുക്കൂര്‍, മുഞ്ഞിനാട്ട് രാമചന്ദ്രന്‍, എസ്.വിനോദ്കുമാര്‍, എം.ആര്‍.ഹരികുമാര്‍, ശ്രീജിത്ത് പത്തിയൂര്‍, എസ്.രാജേന്ദ്രന്‍, തുണ്ടത്തില്‍ ശ്രീഹരി, പി.ജി.ശാന്തുകുമാര്‍, യു.അശോക്കുമാര്‍, പി.ഡി. ശ്രീനിവാസന്‍, കെ.ദേവദാസ്, റീനാസജീവ്, പി.മുകുന്ദന്‍, കെ.ജി ഓമനകുട്ടന്‍, പി.ഡി സുനില്‍, കെ.രാമചന്ദ്രന്‍, ശ്രീദേവിരാജന്‍, ശോഭാ ഓമനകുട്ടന്‍, സ്‌നേഹ എന്നിവര്‍ സംസാരിച്ചു.