ഘോഷയാത്ര കിഴക്കേകോട്ടയില്‍ നിന്നും ആരംഭിക്കും
തിരുവനന്തപുരം: ഗണേശോത്സവ ട്രസ്റ്റ് കമ്മിറ്റിയുടെ ആഭിമുഖ്യത്തില്‍ ഗണേശോത്സവ ആഘോഷങ്ങള്‍ക്ക് സമാപനം കുറിച്ചുള്ള സാംസ്‌കാരിക സമ്മേളനവും വിഗ്രഹ ഘോഷയാത്രയും ഇന്ന് നടക്കും. ജില്ലയിലെ 70 പ്രധാന കേന്ദ്രങ്ങളില്‍ നിന്നും ആരംഭിക്കുന്ന ഘോഷയാത്രകള്‍ പഴവങ്ങാടി ഗണപതി ക്ഷേത്രത്തിന് മുന്നില്‍ എത്തിച്ചേരുന്നതോടെ സാംസ്‌കാരിക സമ്മേളനത്തിനും പ്രധാന ഘോഷയാത്രയ്ക്കും തുടക്കമാകും.
സാംസ്‌കാരിക സമ്മേളനം ശശിതരൂര്‍ എം.പി ഉദ്ഘാടനം ചെയ്യും. വി.എസ് ശിവകുമാര്‍ എം.എല്‍.എ അധ്യക്ഷനാകും. എം.വി ശ്രേയാംസ്‌കുമാര്‍ മുഖ്യാതിഥിയാകും. കെ. മുരളീധരന്‍ എം.എല്‍.എ, ഡി.ജി.പി ലോക്‌നാഥ് ബെഹ്‌റ, ഡോ:ജി മാധവന്‍ നായര്‍, മുന്‍ ഡി.ജി.പി അലക്‌സാണ്ടര്‍ ജേക്കബ്, പാളയം സെന്റ് ജോസഫ് മെട്രോപോളിടണ്‍ വികാരി റവ:ഡോ.ജോര്‍ജ്ജ് ജെ.ഗോമസ്, മൂകാംബിക ക്ഷേത്ര മേല്‍ശാന്തി ശ്രീധരന്‍ അഡിഗ, ബാലരാമപുരം ജുമാ മസ്ജിദ് ചീഫ് ഇമാം പാച്ചല്ലൂര്‍ അബ്ദുസലീം മൗലവി, സ്വാമി ഗുരുരത്‌നം ജ്ഞാന തപസ്വി തുടങ്ങിയവര്‍ സംബന്ധിക്കും.
പത്മനാഭ സ്വാമി ക്ഷേത്രത്തിന് മുന്നില്‍ നിന്നും ആരംഭിക്കുന്ന വാദ്യഘോഷമേളം പത്മനാഭസ്വാമി ക്ഷേത്രം എക്‌സിക്യൂട്ടിവ് ഓഫിസര്‍ രതീശന്‍ ഉദ്ഘാടനം ചെയ്യും. തുടര്‍ന്ന് ഗണേശവിഗ്രഹ ഘോഷയാത്ര ആരംഭിക്കും. രണ്ടായിരത്തോളം കലാകാരന്മാര്‍ വാദ്യമേളങ്ങള്‍ക്ക് നേതൃത്വം നല്‍കും. കിഴക്കേകോട്ടയില്‍ നിന്നും ആരംഭിക്കുന്ന ഘോഷയാത്ര ഓവര്‍ബ്രിഡ്ജ്, ആയൂര്‍വേദ കോളജ്, സ്റ്റാച്യൂ, പാളയം, എ.കെ.ജി സെന്റര്‍, ജനറല്‍ ആശുപത്രി, പാറ്റൂര്‍, പേട്ട, ചാക്ക, ആള്‍സെയിന്റ്‌സ് വഴി ശംഖുമുഖം ആറാട്ടുകടവില്‍ എത്തിച്ചേരും.