ജെയ്പൂര്‍: ബി.ജെ.പി ഭരിക്കുന്ന ഉത്തര്‍പ്രദേശിനും ഛത്തിസ്ഗഡിനും പിന്നാലെ രാജസ്ഥാനിലും നവജാത ശിശുക്കളടക്കം 86 കുട്ടികള്‍ മരിച്ചു. കഴിഞ്ഞ രണ്ടുമാസത്തിനിടയിലാണ് ഇത്രയും കുട്ടികള്‍ മരിച്ചത്. ഇവരില്‍ 37 പേരുടെ മരണം ഓക്‌സിജന്‍ ലഭ്യമാക്കുന്ന കാര്യത്തില്‍ ഡോക്ടര്‍മാരുടെ ഭാഗത്തുനിന്നുണ്ടായ അശ്രദ്ധകാരണമെന്നാണ് വിവരം.
ബന്‍സ്വാര ജില്ലാ ആശുപത്രിയിലാണ് 86 കുട്ടികളും മരിച്ചത്. നാല് ആഴ്ച മാത്രം പ്രായമുള്ള കുട്ടികളടക്കം മരിച്ചതായി ആശുപത്രി ചീഫ് മെഡിക്കല്‍ ഓഫിസര്‍ ഡോ. എച്ച്.എല്‍ താബിയാര്‍ പറഞ്ഞു. ജൂലൈ, ഓഗസ്റ്റ് മാസങ്ങളിലുണ്ടായ സംഭവം പുറത്തായതോടെ സര്‍ക്കാര്‍ അന്വേഷണത്തിന് ഉത്തരവിട്ടിട്ടുണ്ട്.
ജനിച്ചപ്പോള്‍ തന്നെ ശ്വാസകോശ സംബന്ധമായ അസുഖമുണ്ടായിരുന്ന കുട്ടികള്‍ക്ക് കൃത്യമായി ഓക്‌സിജന്‍ നല്‍കേണ്ടിയിരുന്നു. എന്നാല്‍, ഇത് ലഭ്യമാക്കുന്ന കാര്യത്തില്‍ വലിയ വീഴ്ചയാണ് ഉണ്ടായത്. ഇതിന് കാരണക്കാരായവര്‍ക്കെതിരേ ശക്തമായ നടപടി സ്വീകരിക്കുമെന്നും ചീഫ് മെഡിക്കല്‍ ഓഫിസര്‍ അറിയിച്ചു.
മരിച്ച നവജാത ശിശുക്കളില്‍ 18 പേരുടെ തൂക്കം കുറവായിരുന്നു. ഇവര്‍ക്ക് അണുബാധയുണ്ടായതോടെയാണ് മരിക്കാനിടയായതെന്നും ചീഫ് മെഡിക്കല്‍ ഓഫിസര്‍ പറയുന്നു.