മണ്ണാര്‍ക്കാട്: എടത്തനാട്ടുകര മുണ്ടകുന്നില്‍ വീണ്ടും കാട്ടാനക്കൂട്ടം വ്യാപകമായി കൃഷി നശിപ്പിച്ചു. കഴിഞ്ഞ പത്ത് ദിവസമായി കാടിറങ്ങിയെത്തുന്ന കാട്ടാനക്കൂട്ടത്തെ കാടുകയറ്റാന്‍ അധികൃതര്‍ കാര്യമായി എടുക്കാത്തതില്‍ പ്രതിഷേധമുയര്‍ന്നിട്ടുണ്ട്.
ചൊവ്വാഴ്ച രാത്രി കാടിറങ്ങിയ കാട്ടാനക്കൂട്ടം ചൂരിയോട്, ചക്കുരല്‍, കാക്കേനി പാടം തുടങ്ങിയ പ്രദേശങ്ങളിലെ കൃഷിയിടത്തിലാണ് വ്യാപകമായി കൃഷി നശിപ്പിച്ചത്. വാഴ, കവുങ്ങ് കൃഷികളാണ് കഴിഞ്ഞ ദിവസമെത്തിയ കാട്ടാനക്കൂട്ടം നശിപ്പിച്ചത്.
പാറോക്കോട്ട് അബ്ദുറഹിമാന്‍, പി. കുഞ്ഞിമോന്‍, ചുങ്കന്‍ വീരാപ്പു ഹാജി, പാറോക്കോട് സൈതാലു ഹാജി, പി.പി സുബൈര്‍, പി.പി സലാം, പി.പി അബ്ദുല്‍ റഷീദ്, പി.പി ഉസ്മാന്‍, പി.പി അലി എന്നിവരുടെ കൃഷികളിലാണ് നാശം വിതച്ചത്.
നേരം ഇരുട്ടുന്നതോടെ കാടിറങ്ങി ജനവാസ മേഖലയിലെത്തുന്ന കാട്ടാനക്കൂട്ടം നേരം പുലരുവോളം പ്രദേശത്ത് ഭീതി പരത്തി അലയുന്നത് കാരണം പ്രദേശവാസികള്‍ക്ക് സമാധാനമായി അന്തിയുറങ്ങാനാവാത്ത സ്ഥിതിയിലാണ്.