സുല്‍ത്താന്‍ ബത്തേരി: ടൗണിലെ ഗതാഗതകുരുക്കിന് പരിഹാരമായി നിര്‍മിക്കാനുദ്ദേശിക്കുന്ന ബൈപ്പാസ് നടപടി ക്രമങ്ങള്‍ ഇഴഞ്ഞുനീങ്ങുന്നു.
100 കോടി രൂപ ചെലവഴിച്ച് നിര്‍മിക്കുന്ന ബൈപ്പാസിന്റെ ഡി.പി.ആര്‍ എന്‍.എച്ച് പി.ഡബ്ല്യു.ഡി വിഭാഗം ദേശീയപാത അതോറിറ്റിക്ക് സമര്‍പ്പിച്ചിട്ടുണ്ടെങ്കിലും എന്‍.എച്ച് അതോറിറ്റി സംഘം നേരിട്ടെത്തി ഡി.പി.ആര്‍ തയ്യാറാക്കിയെങ്കില്‍ മാത്രമേ പാതയുടെ നിര്‍മാണം ആരംഭിക്കുവെന്ന അവസ്ഥയാണിപ്പോള്‍.
ബത്തേരി മാനിക്കുനി എല്‍.ഐ.സി ഓഫിസ് പരിസരത്ത് നിന്നു ആരംഭിച്ച് തിരുനെല്ലിയില്‍ അവസാനിക്കുന്നതാണ് നിര്‍ദിഷ്ട ബൈപ്പാസ്.
നിലവില്‍ ബൈപ്പാസിനുള്ള സ്ഥലമേറ്റെടുക്കുന്നതുമായി ബന്ധപ്പെട്ടുള്ള വിശദമായ പ്രൊജക്ട് റിപ്പോര്‍ട്ട് എന്‍.എച്ച് പി.ഡബ്ല്യൂ.ഡി വിഭാഗം ദേശീയപാത അതോറിറ്റിക്ക് സമര്‍പ്പിച്ചതായി അധികൃതര്‍ പറഞ്ഞു. 100 കോടി രൂപ ചിലവില്‍ മുപ്പത് മീറ്റര്‍ വീതിയില്‍ നാല് കിലോമീറ്റര്‍ ദൂരമാണ് നിര്‍ദിഷ്ട ബൈപ്പാസിനുള്ളത്. ഡി.പി.ആര്‍ തയ്യാറാക്കുന്നതിനായി 21 ലക്ഷം രൂപയാണ് ചിലവഴിച്ചത്. നിലിവില്‍ 30മീറ്റര്‍ വീതിയില്‍ നാല് കിലോമീറ്റര്‍ ദൂരം ബൈപ്പാസ് നര്‍മിക്കുന്നതിനായി ഏകദേശം 30ഏക്കറോളം സ്ഥലം ഏറ്റെടുക്കേണ്ടതായി വരും.
അതേ സമയം ദേശീയപാതയുടെ വീതികൂട്ടലുമായി ബന്ധപ്പെട്ടുള്ള നടപടികള്‍ പുരോഗമിക്കുകയാണെന്നും അതിനാല്‍ ബൈപ്പാസിന്റെ കാര്യങ്ങള്‍ എന്‍.എച്ച് അതോറിറ്റിയുടെ സംഘം നേരിട്ടെത്തി വീണ്ടും ഡി.പി.ആര്‍ തയ്യാറാക്കണമെന്നാണ് അറിയുന്നത്. അത് എന്ന് നടക്കുമെന്ന് അറിയല്ലെന്നുമാണ് എന്‍.എച്ച് പി.ഡബ്ല്യു.ഡി അധികൃതരില്‍ നിന്നും ലഭിക്കുന്ന വിവരം. ഇതോടെ രണ്ടുവര്‍ഷം മുന്‍പ് പ്രഖ്യാപിച്ച് ബത്തേരിയിലെ ദേശീയപാത ബൈപ്പാസ് നിര്‍മാണം ഇനിയും വൈകുമെന്നതാണ് സത്യം. ബൈപ്പാസിനുള്ള സ്ഥലം ഏറ്റെടുക്കല്‍ മറ്റ് നടപടിക്രമങ്ങള്‍ അടക്കമാണ് മുന്‍സര്‍ക്കാര്‍ 100 കേടി രൂപ അനുവദിച്ചത്. അതേസമയം ബൈപ്പാസ് പൂര്‍ത്തിയാവുന്നതോടെ ബത്തേരി ടൗണിലെ ഗതാഗതകുരുക്കിന് ശാശ്വത പരിഹാരമാവുമെന്നാണ് പ്രതീക്ഷ.