ഗൂഡല്ലൂര്‍: നീലഗിരിയില്‍ നഷ്ടത്തിലേക്ക് കൂപ്പുകുത്തി തമിഴ്‌നാട് ട്രാന്‍സ്‌പോര്‍ട്ട് കോര്‍പ്പറേഷന്‍.
2015 ജനുവരി മുതല്‍ 2017 മാര്‍ച്ച് വരെ 189 കോടി രൂപയാണ് കോര്‍പ്പറേഷന്റെ അധിക ചെലവ്. ഇക്കാലയളവില്‍ 290.87 കോടി രൂപയാണ് വരുമാനം. എന്നാല്‍ ജീവനക്കാരുടെ ശമ്പളം, പെന്‍ഷന്‍, മറ്റു ചെലവുകള്‍ എന്നിവയ്ക്കായി 479. 21 കോടി രൂപയാണ് കോര്‍പ്പറേഷന്‍ ചെലവഴിച്ചത്. സ്വകാര്യബസ് സര്‍വിസ് ഇല്ലാത്തതിനാല്‍ തമിഴ്‌നാട് ട്രാന്‍സ്‌പോര്‍ട്ട് ബസുകള്‍ മാത്രമാണ് യാത്രക്കാര്‍ ആശ്രയിക്കുന്നത്. കോര്‍പ്പറേഷന്‍ അധികൃതരുടെ കെടുകാര്യസ്ഥതയാണ് നഷ്ടത്തിന് കാരണമെന്ന ആക്ഷേപം ശക്തമാണ്.
2284 ജീവനക്കാരും 342 ബസുകളുമാണ് ഡിപ്പോ, സബ് ഡിപ്പോകളിലായി ജില്ലയിലുള്ളത്. ഇതില്‍ കഴിഞ്ഞ രണ്ട് വര്‍ഷത്തിനിടക്ക് 22 ബസുകള്‍ കുറക്കുകയും ചെയ്തു. 178 ഗ്രാമീണ സര്‍വിസുകള്‍, 160 അയല്‍ ജില്ലാ സര്‍വിസുകള്‍, 26 അന്തര്‍ സംസ്ഥാന സര്‍വിസുകള്‍ എന്നിങ്ങനെയാണ് നീലഗിരിയിലെ വിവിധ ഡിപ്പോകളില്‍ നിന്നായി നടത്തുന്നത്. ഇതില്‍ മിക്ക ബസുകളും തമിഴ്‌നാട്ടിലെ മറ്റു ജില്ലകളിലെ ഡിപ്പോകളില്‍ നിന്നുള്ള പഴയ ബസുകളാണ്. കൂടാതെ പുതിയ ബസുകള്‍ ഇറക്കുന്നതിന് പകരം മറ്റു ജില്ലകളിലെ പഴയ ബസുകളാണ് ജില്ലയിലെത്തുന്നത്. ഇതു കാരണം ജില്ലയിലെ ഗ്രാമീണ സര്‍വിസുകള്‍ പാതിവഴിയില്‍ കുടുങ്ങുന്നത് പതിവ് കാഴ്ചയാണ്. കൂടാതെ മഴക്കാലത്ത് ചോര്‍ന്നൊലിക്കുന്നതിനാല്‍ ബസിലിരിക്കാന്‍ കഴിയാത്ത സ്ഥിതിയാണ്. നിരവധി ട്രിപ്പുകളാണ് ഇത്തരത്തില്‍ ദിവസവും റദ്ദാകുന്നത്. കൂടാതെ ആവശ്യത്തിന് സ്‌പെയര്‍പാര്‍ട്‌സുകള്‍ ഇല്ലാത്തതും ട്രിപ്പുകള്‍ മുടങ്ങുന്നതിന് കാരണമാകുന്നുണ്ട്.
കോര്‍പ്പറേഷന്റെ കെടുകാര്യസ്ഥത ടാക്‌സി വാഹനങ്ങള്‍ക്കാണ് അനുഗ്രഹമാകുന്നത്. സമാന്തര സര്‍വിസ് നടത്തുന്ന ടാക്‌സി വാഹനങ്ങള്‍ ലാഭം കൊയ്യുകയാണ്.
ശമ്പള, പെന്‍ഷന്‍ കുടിശ്ശിക നല്‍കാത്തതില്‍ പ്രതിഷേധിച്ച് തമിഴ്‌നാട്ടില്‍ ഈമാസം 24 മുതല്‍ തൊഴിലാളികള്‍ പണിമുടക്കിന് ഒരുങ്ങുകയാണ്. ഇതോടെ ജില്ലയിലെ സര്‍വിസുകള്‍ പൂര്‍ണമായും താളം തെറ്റും.
സ്വകാര്യബസ് സര്‍വിസ് ഇല്ലാത്ത ജില്ലയില്‍ ഗ്രാമീണ സര്‍വിസുകളും ജില്ലാ, അന്തര്‍ സംസ്ഥാന സര്‍വിസുകളും കാര്യക്ഷമമാക്കിയാല്‍ ലാഭത്തിലെത്തിക്കാമെന്നിരിക്കെ, ഓടിത്തളര്‍ന്ന ബസുകള്‍ സര്‍വിസിനിറക്കി അധികൃതര്‍ അലംഭാവം തുടരുകയാണ്. ജില്ലയിലെ യാത്രാ ക്ലേശം പരിഹരിക്കാനും കോര്‍പ്പറേഷന്റെ പ്രവര്‍ത്തനം കാര്യക്ഷമമാക്കാനും സര്‍ക്കാര്‍ അടിയന്തരമായി ഇടപെടണമെന്ന ആവശ്യം ശക്തമാണ്. ജില്ലയില്‍ സ്വകാര്യ ബസ് സര്‍വിസ് അനുവദിക്കാന്‍ നടപടിയുണ്ടാകണമെന്നാണ് ജില്ലയുടെ പൊതു ആവശ്യം.