പളളുരുത്തി: സുഗന്ധവ്യഞ്ജന കയറ്റുമതി സ്ഥാപനത്തില്‍ നിന്നും കുരുമുളക് കടത്തിക്കൊണ്ടു പോകുന്നതിനിടയില്‍ സ്ഥാപനത്തിലെ രണ്ടു ജീവനക്കാരെ വാഹന പരിശോധനക്കിടയില്‍ കണ്ണമാലി പൊലിസ് പിടികൂടി. കുമ്പളങ്ങി കാരത്തറ വീട്ടില്‍ ഷിബീഷ് (37) ഇല്ലിക്കല്‍ ജംങ്ഷനു സമീപം ചക്കാലക്കല്‍ വീട്ടില്‍ സി.എ.അരുണ്‍ (27) എന്നിവരാണ് അറസ്റ്റിലായത്. കണ്ണമാലിയിലെ ബാഫ് നാ എക്‌സ്‌പോര്‍ട്ട് കമ്പിനിയിലെ സൂപ്പര്‍വൈസര്‍മാരാണ് ഇരുവരും. തിങ്കളാഴ്ച കമ്പിനിയില്‍ നിന്ന് ഇറങ്ങവെ ഒരു ക്വിന്റലോളം കുരുമുളക് ഇവര്‍ മോഷ്ടിച്ചു കടത്തുകയായിരുന്നു.
അരുണിന്റെ കാറില്‍ നാലു ചാക്കുകളിലായാണ് തൊണ്ടിമുതല്‍ കടത്തിയതെന്ന് പൊലിസ് പറഞ്ഞു. കണ്ടക്കടവിനു സമീപം വാഹന പരിശോധന നടത്തുകയായിരുന്ന കണ്ണമാലി എസ്. ഐ പ്രദീപ് ചന്ദ്രന്റെ നേതൃത്വത്തിലാണ് ഇവരെ പിടികൂടിയത്. സ്ഥിരമായി ഇവര്‍ കമ്പിനിയില്‍ നിന്നും കുരുമുളക് മോഷ്ടിച്ചു കടത്തിവരികയായിരുന്നുവെന്ന് ചോദ്യം ചെയ്യലില്‍ ഇവര്‍ പൊലിസിനോട് സമ്മതിച്ചു. കോടതിയില്‍ ഹാജരാക്കിയ പ്രതികളെ റിമാന്റ് ചെയ്തു.