ധാക്ക: റാഖിന്‍ പ്രദേശത്തു നിന്ന് ഉറ്റവരില്ലാതെ അഭയം തേടിയെത്തിയവരില്‍ നൂറുകണക്കിന് കുട്ടികളുണ്ടെന്ന് റിപ്പോര്‍ട്ട്. ഓഗസ്റ്റ് 25ന് ആരംഭിച്ച ആക്രമണത്തില്‍ ഇതുവരെ 1,100 കുട്ടികള്‍ ഉറ്റവരെ ഉപേക്ഷിച്ച് ബംഗ്ലാദേശില്‍ എത്തിര്‍ച്ചേര്‍ന്നിട്ടുണ്ടെന്ന് യുനിസെഫ് ഔദ്യോഗിക വൃത്തങ്ങള്‍ അറിയിച്ചു. ഇത്തരത്തിലുള്ള കുട്ടികളെ ലൈംഗികചൂഷണം, മനുഷ്യക്കടത്ത്, ശാരീരിക പീഡനം എന്നിവയ്ക്ക് ഇരയാകുന്നുണ്ടെന്ന് അവര്‍ പറഞ്ഞു. പുഴകളും കാടുകളും കടന്നാണ് കുട്ടികള്‍ ബംഗ്ലാദേശില്‍ എത്തിച്ചേരുന്നത്. ഇവരില്‍ ഭൂരിഭാഗം പേരുടെയും കുടുംബാംഗങ്ങള്‍ സര്‍ക്കാരിന്റെയോ ബുദ്ധസന്യാസികളുടെയോ ആക്രമണങ്ങളില്‍ കൊല്ലപ്പെട്ടവരാണ്.
അതിര്‍ത്തി കടക്കുന്നതിനിടെ മ്യാന്‍മര്‍ സൈന്യത്തിന്റെ വെടിയവയ്പ്പില്‍ നിന്ന് അത്ഭുകരമായി രക്ഷപ്പെട്ടവരും ഇവരുടെ കൂട്ടത്തിലുണ്ട്. മൂന്നാഴ്ചയ്ക്കിടെ 3,70,000 റോഹിംഗ്യകള്‍ ബംഗ്ലാദേശില്‍ അഭയം തേടിയിട്ടുണ്ടെന്നാണ് യു.എന്‍ കണക്ക്. ഈ മാസം മുതല്‍ അഭയം തേടി എത്തിയ 1,28,000 റോഹിംഗ്യകളില്‍ 60 ശതമാനവും കുട്ടികളാണ്. ഇവരില്‍ 1200 പേര്‍ ഒരു വയസിന് താഴെയുള്ളവരുമാണ്.
എന്നാല്‍ വ്യാപകമായിരിക്കുന്ന അഭയാര്‍ഥി ക്യംപുകള്‍ക്കിടയില്‍ നിന്ന് കുട്ടികളെ മാത്രം തിരഞ്ഞെടുക്കുകയെന്നുള്ളത് സന്നദ്ധ സംഘടനകളെ കുഴക്കുന്ന പ്രശ്‌നമാണ്. ഇത്തരത്തിലുള്ള കുട്ടികള്‍ക്ക് കൂടുതല്‍ പിന്തുണ വേണമെന്നും അവരുടെ കുടുംബാംഗങ്ങളെ കണ്ടെത്താന്‍ സഹായങ്ങള്‍ ആവശ്യമാണെന്നും കുട്ടികളുടെ സംരക്ഷണത്തിനായി പ്രവര്‍ത്തിക്കുന്ന സന്നദ്ധ പ്രവര്‍ത്തകന്‍ ജോര്‍ ഗ്രഹാം പറഞ്ഞു.