മൂവാറ്റുപുഴ: സഹപാഠിക്കൊരു കൈതത്താങ്ങുമായി മൂവാറ്റുപുഴ തര്‍ബിയത്ത് ട്രസ്റ്റ് വൊക്കേഷണല്‍ ഹയര്‍ സെക്കണ്ടറി സ്‌കൂളിലെ നാഷണല്‍ സര്‍വീസ് സ്‌കീം. സ്‌കൂളിലെ നാഷണല്‍ സര്‍വീസ് സ്‌കീമിന്റെ നേതൃത്വത്തില്‍ 'സ്‌നേഹ സ്പര്‍ശം' പദ്ധതിയിലൂടെ വിദ്യാര്‍ഥികളില്‍ നിന്നും സമാഹരിച്ച 41,500 രൂപ സ്‌കൂളിലെ വി.എച്ച്.എസ്.ഇ വിദ്യാര്‍ഥിയായ അജു ഷാജിയുടെ പിതാവിന്റെ കിഡ്‌നി മാറ്റിവയ്ക്കല്‍ ശസ്ത്രക്രിയക്ക് കൈമാറി. നിര്‍ധനരായ സഹപാഠികള്‍ക്ക് കൈത്താങ്ങാകുക എന്നലക്ഷ്യത്തോടെ തര്‍ബിയത്ത് ട്രസ്റ്റ് വൊക്കേഷണല്‍ ഹയര്‍ സെക്കന്ററി സ്‌കൂളിലെ നാഷണല്‍ സര്‍വ്വീസ് സ്‌കീമിന്റെ നേതൃത്വത്തില്‍ 'സ്‌നേഹ സ്പര്‍ശം' പദ്ധതി ആരംഭിച്ചത്. വിദ്യാര്‍ഥികള്‍ സമാഹരിച്ച 41,500 രൂപ എന്‍.എസ്.എസ്. പ്രോഗ്രാം ഓഫിസര്‍ എം.എ.രാജന്റെ സാന്നിധ്യത്തില്‍ എന്‍.എസ്.എസ് വോളന്റിയര്‍ മുസൈനയില്‍ നിന്നും സ്‌കൂള്‍ പ്രിന്‍സിപ്പാള്‍ ജൂലി ഇട്ടിയക്കാട്ട് ഏറ്റുവാങ്ങി. സ്‌കൂള്‍ മാനേജര്‍ ടി.എസ് അമീര്‍, അധ്യാപകരായ സ്റ്റീഫന്‍ പോള്‍, എം.കെ സലീന എന്നിവര്‍ സംമ്പന്ധിച്ചു. സ്‌നേഹസ്പര്‍ശം പദ്ധതിക്കായി അധ്യാപകരും സ്‌കൂള്‍ മാനേജുമെന്റും സഹകരിച്ചു.