കൊച്ചി: സമൂഹത്തെ നേര്‍വഴിക്ക് നയിക്കാന്‍ സ്ത്രീകള്‍ മുന്നിട്ടിറങ്ങണമെന്ന് ലോക്‌സഭ സ്പീക്കര്‍ സുമിത്ര മഹാജന്‍. ഏതൊരു പ്രശ്‌നവും സഹിഷ്ണുതയോടെ കൈകാര്യം ചെയ്യാനുള്ള കഴിവ് സ്ത്രീകള്‍ക്കുള്ളതിനാല്‍ പുരുഷന്മാരുടെ പിന്നിലല്ല നില്‍ക്കേണ്ടത്. അവരോടൊപ്പം തന്നെനിന്ന് മുന്നോട്ടുപോകാന്‍ കഴിയണമെന്നും സ്പീക്കര്‍ കൂട്ടിച്ചേര്‍ത്തു. കേരള ക്ഷേത്ര സംരക്ഷണ സമിതി മാതൃസമിതിയുടെ ആഭിമുഖ്യത്തില്‍ എളമക്കര ഭാസ്‌കരീയത്തില്‍ സംഘടിപ്പിച്ച മാതൃശക്തി സംഗമം ഉദ്ഘാടനം ചെയ്യുകയായിരുന്നു അവര്‍.
സാമൂഹിക പ്രശ്‌നങ്ങള്‍ പരിഹരിക്കാനുള്ള കഴിവും കരുത്തും സ്ത്രീകള്‍ക്കുള്ളതിനാല്‍ അതിനായി അവര്‍ മുന്നിട്ടിറങ്ങണമെന്നും സ്പീക്കര്‍ കൂട്ടിച്ചേര്‍ത്തു. അനീതിക്കെതിരേ ശബ്ദമുയര്‍ത്താന്‍ സ്ത്രീകള്‍ക്ക് കഴിയണം. തെറ്റായ രീതിയില്‍ ഭര്‍ത്താവ് പണം സമ്പാദിച്ചാല്‍പ്പോലും അത് തെറ്റാണെന്ന് പറയാന്‍ കഴിയുന്നവരായിരിക്കണം സ്ത്രീകളെന്നും അവര്‍ പറഞ്ഞു. സംസ്ഥാന പ്രസിഡന്റ് ശാന്ത എസ്. പിള്ള അധ്യക്ഷയായി. ബി.ജെ.പി സംസ്ഥാന അധ്യക്ഷന്‍ കുമ്മനം രാജശേഖരനെ ചടങ്ങില്‍ ആദരിച്ചു. തിരുവനന്തപുരം ഏകലവ്യ ആശ്രമം മഠാധിപതി സ്വാമി അശ്വതി തിരുനാള്‍ പ്രഭാഷണം നടത്തി.