പഴയങ്ങാടി: പിലാത്തറ-പാപ്പിനിശ്ശേരി കെ.എസ്.ടി.പി റോഡിലെ അപകടങ്ങള്‍ ഒഴിവാക്കുന്നത് സംബന്ധിച്ച് പഠിക്കുന്നതിനും മേഖലയെ റോഡ് സേഫ്റ്റി കോറിഡോര്‍ ആക്കി മാറ്റുന്നതിനുമായി നാറ്റ്പാകിന്റെ ഉന്നതതല സംഘം റോഡ് സന്ദര്‍ശിച്ചു. പിരിക്കാംതടം, മണ്ടൂര്‍, ഭാസ്‌ക്കരന്‍ പീടിക, അടുത്തില, എരിപുരം ട്രാഫിക് ഐലന്റ്, പഴയങ്ങാടി, താവം, വെള്ളറങ്ങല്‍, ചെറുകുന്ന്, പള്ളിച്ചാല്‍, ചെറുകുന്ന് തറ, കണ്ണപുരം, ഇരിണാവ് പാപ്പിനിശ്ശേരി എന്നിവിടങ്ങളില്‍ പരിശോധന നടത്തി. കഴിഞ്ഞ ഒരു വര്‍ഷമായി റോഡില്‍ നടന്നിട്ടുള്ള അപകടങ്ങളെ സംബന്ധിച്ച് ഓഡിറ്റിങ് നടത്തും. തുടര്‍ന്ന് മേഖലയെ അപകടരഹിതമാക്കി മാറ്റുന്നതിനാവശ്യമായ വിശദമായ മാതൃകാ പദ്ധതി തയാറാക്കും. അതിനു മുന്നോടിയായിട്ടാണ് സംഘം പരിശോധന നടത്തിയത്. ടി.വി രാജേഷ് എം.എല്‍.എ, നാറ്റ്പാക് ഡയറക്ടര്‍ ഡോ. പ്രകാശ് കുമാര്‍, ഡോ. ഷെഹിം, ഡോ. അനീഷ്‌കിനി, സയ്ദ് മുഹമ്മദ്, പി. രാമകൃഷ്ണ എന്നിവരാണ് സംഘത്തില്‍ ഉണ്ടായത്.