കൊച്ചി: കോണ്‍ഗ്രസ് മുഖപത്രമായ വീക്ഷണത്തിന്റെ അംഗീകാരം കേന്ദ്രസര്‍ക്കാര്‍ റദ്ദാക്കി. പത്രം പ്രസിദ്ധീകരിക്കുന്ന കമ്പനി ബാലന്‍സ് ഷീറ്റ് സമര്‍പ്പിക്കാത്തതിനെ തുടര്‍ന്നാണ് കേന്ദ്രത്തിന്റെ നടപടി.

പത്രം അനധികൃതമായി പ്രവര്‍ത്തിക്കുന്നതാണെന്ന് കാണിച്ചാണ് കേന്ദ്രം കമ്പനിയുടെ അംഗീകാരം റദ്ദാക്കിയത്.

കളളപ്പണത്തിനെതിരായ കേന്ദ്രസര്‍ക്കാര്‍ സ്വീകരിച്ച കടുത്ത നടപടികളുടെ ഭാഗമായാണ് നടപടിയെന്നാണ് റിപ്പോര്‍ട്ട്.

ഇതിനു പുറമെ ഡയറക്ടര്‍മാരായ ആറുപേരെയും കേന്ദ്രം അയോഗ്യരാക്കിയിട്ടുമുണ്ട്. പ്രതിപക്ഷ നേതാവ് രമേശ് ചെന്നിത്തല, മുതിര്‍ന്ന കോണ്‍ഗ്രസ് നേതാവ് വി.എം സുധീരന്‍ അടക്കമുള്ളവരെയാണ് അയോഗ്യരാക്കിയത്.

അയോഗ്യരായതോടെ ഇവര്‍ക്ക് മറ്റു സ്ഥാപനങ്ങളുടെ ഡയറക്ടര്‍ സ്ഥാനം അടുത്ത അഞ്ച് വര്‍ഷത്തേക്ക് വഹിക്കാന്‍ സാധിക്കില്ല.

അതേസമയം, നോര്‍ക്ക റൂട്ട്‌സിനേയും പൂട്ടിയ കമ്പനിയായി സര്‍ക്കാര്‍ പ്രഖ്യാപിച്ചിട്ടുണ്ട്.  കേരളത്തില്‍ മാത്രം 12,000 കമ്പനി ഡയറക്ടര്‍മാര്‍ക്കാണ് കേന്ദ്രം അയോഗ്യത കല്‍പ്പിച്ചത്.