കൊച്ചി: വാളിനേക്കാള്‍ മൂര്‍ച്ചയേറിയതാണ് പേനയെന്ന് പറഞ്ഞു പതിഞ്ഞ വാചകം. എന്നാല്‍, ആ പേനയെ ഒരു വര്‍ഗീയശക്തിക്കും അടിച്ചമര്‍ത്താന്‍ കഴിയില്ലെന്ന് വിളിച്ചോതാന്‍ പടുകൂറ്റന്‍ പേന തയാറായിക്കഴിഞ്ഞു. ആറരമീറ്റര്‍ നീളവും 75 സെന്റിമീറ്റര്‍ വ്യാസവുമുള്ള എഴുതാവുന്ന ലോകത്തിലെ ഏറ്റവും വലിയ പേന നാളെ കൊച്ചിയിലെ ഒബ്രോണ്‍ മാളില്‍ പ്രദര്‍ശനത്തിനെത്തും. തുടര്‍ന്ന് സാമൂഹിക സാംസ്‌കാരിക രംഗത്തെ 15 പേര്‍ ചേര്‍ന്ന് പേനകൊണ്ട് ഇങ്ങനെ കുറിക്കും; 'നമ്മള്‍ ഒന്ന് '.
ഇരുമ്പും മരവും പ്ലാസ്റ്റിക്കും കൊണ്ട് പേന നിര്‍മിച്ചത് കാര്‍ട്ടൂണിസ്റ്റും ഗിന്നസ് റെക്കോര്‍ഡ് ജേതാവുമായ കോഴിക്കോട് നെല്ലിക്കാപ്പറമ്പ് സ്വദേശി എം. ദിലീഫാണ്. വര്‍ഗീയശക്തികള്‍ എഴുത്തിനെതിരേ തോക്കെടുക്കുമ്പോള്‍ ഏറ്റവും വലിയ പേനകൊണ്ട് പ്രതിരോധം തീര്‍ക്കുകയാണ് ദിലീഫ്. മൂന്ന് ലക്ഷം രൂപയാണ് നിര്‍മാണ ചെലവ്. തന്റെ സുഹൃത്തിന്റെ കോഴിക്കോട്ടുള്ള സ്ഥാപനത്തില്‍ വച്ചായിരുന്നു നിര്‍മാണം പൂര്‍ത്തിയാക്കിയത്. നാളെ മുതല്‍ ഒരുമാസക്കാലം പേന ഒബ്രോണ്‍മാളില്‍ പ്രദര്‍ശിപ്പിക്കും. ഐഷയാണ് പേന രൂപകല്‍പന ചെയ്തത്. രണ്ട് ഗിന്നസ് സാക്ഷികളും നാളത്തെ പ്രദര്‍ശനത്തിനെത്തുന്നുണ്ട്. ലോകത്തിലെ ഏറ്റവും വലിയ ഓടുന്ന സൈക്കിള്‍ നിര്‍മിച്ച് ദിലീഫ് ഇതിനകം ഗിന്നസ് ബുക്കില്‍ ഇടം നേടിയിട്ടുണ്ട്.