സുല്‍ത്താന്‍ ബത്തേരി: നെന്മേനി പഞ്ചയാത്തിലെ ചീരാലിനു പുറമെ ബത്തേരി നഗരസഭയിലെ ബീനാച്ചി മന്ദംകൊല്ലി, പഴുപ്പത്തൂര്‍ പ്രദേശങ്ങളും കടുവ ഭീതിയില്‍. കഴിഞ്ഞ വെള്ളിയാഴ്ച പ്രദേശവാസിയായ തോട്ടുംപള്ളി സദാനന്ദന്റെ രണ്ടര വയസുള്ള മൂരിക്കുട്ടിയെ കടുവ കൊന്നു. തൊട്ടുടുത്ത ദിവസങ്ങളിലും പ്രദേശവാസികള്‍ കടുവയെ കണ്ടിരുന്നു. സമീപത്തെ ബീനാച്ചി എസ്റ്റേറ്റില്‍ കടുവയുണ്ടെന്നും വനംവകുപ്പ് അടുത്തിടെ സ്ഥരീകരിച്ചിരുന്നു. എസ്‌റ്റേറ്റിനും കുറിച്യാട് വനമേഖലയുടെയും ഇടക്കാണ് മന്ദംകൊല്ലി, പഴുപ്പത്തൂര്‍ ഉള്‍പ്പെടുന്ന പ്രദേശങ്ങള്‍. ജനങ്ങളുടെ ഭീതിക്ക് പരിഹാരം കാണുന്നതിനായി കടുവയെ കൂടുവെച്ച് പിടികൂടണമെന്നാണ് ആവശ്യം ഉയരുന്നത്. അതേസമയം വനംവകുപ്പ് പട്രോളിങ് നടത്തുന്നുണ്ട്. എന്നാല്‍ ഇത്‌പോരെന്നും കൂട് വെച്ച് കടുവയെ പിടികൂടണമെന്ന ആവശ്യവുമാണ് ജനങ്ങള്‍ ഉന്നയിക്കുന്നത്.