തളിപ്പറമ്പ്: ദുരൂഹസാഹചര്യത്തില്‍ വെടിയേറ്റ യുവാവിനെ പരിയാരം മെഡിക്കല്‍ കോളജില്‍ പ്രവേശിപ്പിച്ചു. പാണപ്പുഴ പറവൂരിലെ മൊട്ടമ്മല്‍ രാജ(44)നെയാണ് ഇന്നലെ വൈകുന്നേരം നാലോടെ വയറിന്റെ ഇടതുഭാഗത്ത് നാടന്‍ തോക്കിന്റെ ഉണ്ട തറച്ചുകയറിയ നിലയില്‍ രണ്ടുപേര്‍ ചേര്‍ന്ന് മെഡിക്കല്‍ കോളജിലെത്തിച്ചത്. പരിയാരം പൊലിസ് എത്തിയപ്പോഴേക്കും മുങ്ങിയ ഇവരെ പിന്നീട് ആശുപത്രി പരിസരത്തുനിന്ന് കസ്റ്റഡിയിലെടുത്തു. സ്ഥിരമായി പറവൂര്‍, വായാട്, കാരക്കുണ്ട് പ്രദേശങ്ങളില്‍ നായാട്ടിന് പോകുന്ന സംഘത്തില്‍പെട്ടയാളാണ് രാജനെന്ന് പൊലിസ് പറഞ്ഞു. നാടന്‍ തോക്കുകളുമായി ഈ ഭാഗത്ത് നിരവധി സംഘങ്ങള്‍ നായാട്ടിന് പോകുന്നതായി വിവരം ലഭിച്ചിട്ടുണ്ട്.