വിജയവാഡ: ന്യൂസിലന്‍ഡ് എ ടീമിനെതിരായ ആദ്യ ത്രിദിന പോരാട്ടത്തില്‍ ഇന്ത്യ എ ടീമിന് തകര്‍പ്പന്‍ വിജയം. ഇന്നിങ്‌സിനും 31 റണ്‍സിനുമാണ് ഇന്ത്യയുടെ വിജയം. കിവി എ ടീമിന്റ ഇന്ത്യന്‍ പര്യടനത്തിന്റെ ഭാഗമായുള്ള ആദ്യ ത്രിദിന പോരാട്ടത്തിലാണ് സനന്ദര്‍ശകര്‍ക്ക് തോല്‍വി പിണഞ്ഞത്. ആദ്യ ഇന്നിങ്‌സില്‍ ഇന്ത്യ 320 റണ്‍സെടുത്തപ്പോള്‍ ന്യൂസിലന്‍ഡിന്റെ രണ്ടിന്നിങ്‌സുകള്‍ യഥാക്രമം 147, 142 റണ്‍സുകളില്‍ അവസാനിപ്പിച്ചാണ് ഇന്ത്യ വിജയം പിടിച്ചത്. രണ്ടിന്നിങ്‌സിലുമായി എട്ട് വീതം വിക്കറ്റുകള്‍ പിഴുത നദീമും കരണ്‍ ശര്‍മയുമാണ് ഇന്ത്യയെ വിജയത്തിലേക്ക് നയിച്ചത്. നേരത്തെ ശ്രേയസ് അയ്യര്‍ (108) സെഞ്ച്വറിയും റിഷഭ് പന്ത് (67) അര്‍ധ സെഞ്ച്വറിയും നേടി ഇന്ത്യയെ മികച്ച സ്‌കോറിലേക്ക് നയിക്കുകയായിരുന്നു.