ഫ്രാന്‍സിന്റെ ആശ്രിത രാജ്യമാണ് കുഞ്ഞന്‍മാരായ ന്യൂകാലിഡോണിയ. ആദ്യ ലോകകപ്പ് അരങ്ങേറ്റം. ഇന്ത്യയെ പോലെ നേരിട്ട് പ്രവേശനം കിട്ടിയതല്ല. നൂറ്റാണ്ട് പഴക്കമുള്ള ഫുട്‌ബോള്‍ പാരമ്പര്യം. ഓഷ്യാനിയ ഫുട്‌ബോള്‍ ചാംപ്യന്‍ഷിപ്പില്‍ റണ്ണറപ്പായാണ് അണ്ടര്‍ 17 ലോകകപ്പില്‍ അരങ്ങേറ്റം കുറിക്കുന്നത്. 2004ല്‍ ഫിഫയില്‍ അംഗത്വം ലഭിച്ചു. കേരളത്തിലെ ഒരു ജില്ലയുടെ അത്ര പോലും ജനമില്ലാത്ത രാജ്യം. 'കാഗു' എന്ന വിളിപ്പേരുള്ള ന്യൂകാലിഡോണിയ അട്ടിമറി സൃഷ്ടിച്ചാന്‍ അത്ഭുതമാകില്ല.

മിഡ്ഫീല്‍ഡ് ജനറല്‍ പോള്‍

ഫ്രഞ്ച് കോളനിയിലെ കൗമാരത്തിന്റെ കൈമുതല്‍ പോരാട്ട വീര്യമാണ്. ലോക ഫുട്‌ബോള്‍ വേദിയിലെ പരിചയ കുറവ് മാത്രമാണ് ദൗര്‍ബല്യം. മധ്യനിരയിലെ കരുത്തന്‍ പോള്‍ ഗോപ് ഫെനെപെയാണ് പ്രതീക്ഷ നല്‍കുന്ന താരം. ഓഷ്യാനിയ ഫുട്‌ബോള്‍ ചാംപ്യന്‍ഷിപ്പില്‍ മൂന്ന് ഗോളുകള്‍ പോള്‍ ഗോപ് ഫെനെപെ നേടി.

തന്ത്രശാലി വകാലി

ഡൊമനിക് വകാലിയാണ് മുഖ്യ പരിശീലകന്‍. കഴിഞ്ഞ ഏപ്രിലില്‍ ആണ് ചുമതല ഏറ്റെടുത്തത്. പരിശീലകനായിരുന്ന മൈക്കല്‍ ക്ലാര്‍ക്കില്‍ നിന്ന് ചുമതല ഏറ്റെടുത്തിട്ട് മാസങ്ങള്‍ മാത്രമാണെന്നതൊന്നും വകാലിയെ വലയ്ക്കുന്നില്ല.

ജയം തേടി ഹോണ്ടുറാസ്

മധ്യ അമേരിക്കന്‍ പ്രതിനിധിയായ ഹോണ്ടുറാസ് ലോകകപ്പിന് എത്തിയിട്ട് ഒരു പതിറ്റാണ്ടായി. ഇത് അഞ്ചാം അണ്ടര്‍ 17 ലോകകപ്പ്. കോണ്‍കാക്കാഫ് ചാംപ്യന്‍ഷിപ്പില്‍ രണ്ടാം സ്ഥാനക്കാരായി യോഗ്യത ഉറപ്പിച്ചു. 2007ല്‍ ആണ് ആദ്യ ലോകകപ്പിന് യോഗ്യത നേടിയത്. 2013ല്‍ ക്വാര്‍ട്ടര്‍ ഫൈനലില്‍ എത്തിയതാണ് മികച്ച പ്രകടനം. 2015 ലെ ചിലി ലോകകപ്പില്‍ ഒരു ജയം പോലും നേടാനകാതെ ആദ്യ റൗണ്ടില്‍ പുറത്തായി. ഇത്തവണ ഫ്രാന്‍സും ജപ്പാനും ന്യൂ കാലിഡോണിയയും ഉള്‍പ്പെട്ട ഗ്രൂപ്പ് ഇയിലാണ് ലാ മിനി എച്ച് വിളിപ്പേരുള്ള ഹോണ്ടുറാസ്.

കാര്‍ലോസും പാട്രികും

അപ്രതീക്ഷിത മുന്നേറ്റം നടത്താന്‍ കഴിവുള്ള ടീം. ഏതു വമ്പന്‍ ടീമിനെയും അട്ടിമറിക്കാന്‍ കരുത്തുണ്ട്. പ്രതിരോധത്തിലെ പാളിച്ചകളാണ് ഹോണ്ടുറാസിനെ വലയ്ക്കുന്നത്. കോണ്‍കാക്കാഫ് ചാംപ്യന്‍ഷിപ്പിലെ ഗോള്‍ഡന്‍ ബൂട്ട് ജേതാവ് കാര്‍ലോസ് മെജിയയും പാട്രിക് പലാസിയോസുമാണ് ശ്രദ്ധേയ താരങ്ങള്‍. കോണ്‍കാക്കാഫിലെ ഒന്‍പത് മത്സരങ്ങളില്‍ അഞ്ചിലും വിജയം നേടി. ക്യൂബയെ 7-1 ന് തകര്‍ത്ത പോരാട്ടത്തില്‍ കാര്‍ലോസും പാട്രികും ഹാട്രിക് നേടി.

വീണ്ടും ഹോസെ

മുന്‍ ദേശിയ താരം ഹോസെ വല്ലാഡെയേഴ്‌സാണ് മുഖ്യ പരിശീലകന്‍. ദീര്‍ഘകാലമായി കൗമാര ടീമിന്റെ പരിശീലകന്‍. തുടര്‍ച്ചയായി മൂന്നാം വട്ടമാണ് അണ്ടര്‍ 17 ലോകകപ്പ് ടീമിനെ പരിശീലിപ്പിക്കുന്നത്.
ലോകകപ്പില്‍ കൂടുതല്‍ നേട്ടങ്ങളിലേക്ക് ഹോണ്ടുറാസിനെ എത്തിക്കാമെന്ന പ്രതീക്ഷയിലാണ് ഹോസെ.