അമ്പലവയല്‍: വീട്ടിലെ കുടിവെള്ള ടാങ്കില്‍ വിഷം കലര്‍ത്തിയതായി പരാതി. ഒന്നേയാര്‍ ജോയ് മോന്റെ വീട്ടിലെ കുടിവെള്ള ടാങ്കിലാണ് വിഷം കലര്‍ത്തിയതായി കണ്ടെത്തിയത്.
അമ്പലവയല്‍ ഹെല്‍ത്ത് ഇന്‍സ്‌പെക്ടര്‍ സ്ഥലത്തെത്തി വെള്ളത്തിന്റെ സാംപിള്‍ ശേഖരിച്ചു. ഇന്നലെ രാവിലെ ആറിന് കുളിക്കുമ്പോഴാണ് ജോയ്‌മോന് വെള്ളത്തില്‍ നിന്ന് കീടനാശിനിയുടെ ഗന്ധം അനുഭവപ്പെട്ടത്.
പരിശോധിച്ചപ്പോള്‍ കുടിവെള്ളത്തില്‍ മാരകമായ കീടനാശിനി കലര്‍ത്തിയിട്ടുള്ളതായി ബോധ്യപെട്ടു. ഈ വെള്ളത്തില്‍ കുളിച്ച ജോയ്‌മോന് ദേഹാസ്വസ്ഥത അനുഭവപെടാനും തുടങ്ങി. കുടിവെള്ളത്തില്‍ കീടനാശിനി കലര്‍ന്നതില്‍ ദുരൂഹത നിലനില്‍ക്കുന്നുണ്ട്.
ഇന്നലെ രാത്രി 11.30വരെ വീട്ടുകാര്‍ വെള്ളം ഉപയോഗിച്ചിരുന്നതാണ് അതിന് ശേഷം മനപൂര്‍വം ആരോ ടാങ്കില്‍ വിഷം കലര്‍ത്തിയതാണെന്ന നിഗമനത്തിലാണ് നാട്ടുകാര്‍.
ഭാര്യയും മൂന്ന് മക്കളും അടങ്ങുന്ന ജോയ്‌മോന്റെ കുടുംബത്തോട് വ്യക്തി വൈര്യാഗ്യമുള്ളവരൊന്നുമില്ലെന്നാണ് ഇവര്‍ പറയുന്നത്.
വാട്ടര്‍ അതോറിറ്റിയുടെ ഗാര്‍ഹിക കണക്ഷനിലില്‍ നിന്നാണ് ടാങ്കിലേക്ക് വെള്ളം എത്തുന്നത്. ടാപ്പ് തുറക്കുമ്പോള്‍ രൂക്ഷമായഗന്ധവും വെള്ളം പതഞ്ഞ് പൊങ്ങുന്നുമുണ്ട്. വിഷം കലര്‍ന്നത് കൃത്യ സമയത്ത് തിരിച്ചറിയാനായതിനാല്‍ വലിയ ദുരന്തമാണ് ഒഴിവായത്. സാംപിളിന്റെ പരിശോധന ഫലം വന്നാലെ ഏത് തരം കീടനാശിനിയാണ് കലര്‍ന്നിട്ടുള്ളതെന്ന് വ്യക്തമാവുകയുള്ളു. ജോയ്‌മോന്‍ അമ്പലവയല്‍ പൊലിസില്‍ പരാതി നല്‍കിയിട്ടുണ്ട്.