കൊച്ചി: ബന്ധുനിയമനവുമായി ബന്ധപ്പെട്ട് മുന്‍ മന്ത്രി ഇ.പി ജയരാജനെതിരേയെടുത്ത കേസ് നിലനില്‍ക്കില്ലെന്ന് വിജിലന്‍സ് ഹൈക്കോടതിയില്‍. ഹൈക്കോടതിയുടെ നിര്‍ദേശത്തെ തുടര്‍ന്നാണ് അന്വേഷണ ഉദ്യോഗസ്ഥന്‍ നിലപാട് വ്യക്തമാക്കിയത്.
ജയരാജന്‍ വ്യവസായമന്ത്രിയായിരിക്കെ ബന്ധുവായ പി.കെ സുധീറിനെ കേരളാ സ്റ്റേറ്റ് ഇന്‍ഡസ്ട്രിയല്‍ എന്റര്‍പ്രൈസസ് എം.ഡിയായി നിയമിച്ചത് വിവാദമായിരുന്നു. പ്രതിപക്ഷ നേതാവ് രമേശ് ചെന്നിത്തലയടക്കമുള്ളവര്‍ വിജിലന്‍സിനു നല്‍കിയ പരാതിയില്‍ ഇ.പി ജയരാജന്‍, പി.കെ സുധീര്‍, വ്യവസായ വകുപ്പ് സെക്രട്ടറി പോള്‍ ആന്റണി എന്നിവര്‍ക്കെതിരേ കേസെടുത്തിരുന്നു. എന്നാല്‍, നിയമനം വിവാദമായതോടെ ഉത്തരവ് റദ്ദാക്കിയ സാഹചര്യത്തില്‍ അഴിമതിനിരോധന നിയമപ്രകാരമുള്ള കേസ് നിലനില്‍ക്കില്ലെന്നാണ് വിജിലന്‍സ് ഡിവൈ.എസ്.പി കെ.വി മഹേഷ് ദാസ് നല്‍കിയ സത്യവാങ്മൂലത്തിലുള്ളത്.
വിജിലന്‍സ് കേസ് റദ്ദാക്കണമെന്ന് ആവശ്യപ്പെട്ട് ഇ.പി ജയരാജന്‍ നല്‍കിയ ഹരജിയെ തുടര്‍ന്ന് സര്‍ക്കാര്‍ നല്‍കിയ വിശദീകരണത്തില്‍ അവ്യക്തതയുണ്ടായിരുന്നു.
നേരത്തേ ഹരജി പരിഗണിച്ച സിംഗിള്‍ബെഞ്ച് കേസ് നിലനില്‍ക്കുമോയെന്ന് വ്യക്തമാക്കണമെന്ന് അന്വേഷണ ഉദ്യോഗസ്ഥനോട് നിര്‍ദേശിച്ചിരുന്നു. തുടര്‍ന്നാണ് സ്റ്റേറ്റ്‌മെന്റ് നല്‍കിയത്. ജയരാജനടക്കമുള്ളവര്‍ ഏതെങ്കിലും തരത്തിലുള്ള നേട്ടം ഉണ്ടാക്കിയിട്ടില്ല.
അതിനാല്‍ അഴിമതിനിരോധന നിയമപ്രകാരമുള്ള കേസ് നിലനില്‍ക്കില്ലെന്നാണ് സത്യവാങ്മൂലത്തിലുള്ളത്.