അലഹബാദ്: മൂന്നു ട്രെയിനുകള്‍ ഒരേ പാളത്തില്‍ ഓടുന്നുവെന്ന് മുന്‍പേ കണ്ടെത്തിയതിനാല്‍ വന്‍ ദുരന്തം ഒഴിവായി. തുരന്തോ എക്‌സ്പ്രസ്, ഹാത്തിയ ആനന്ദ് വിഹാര്‍ എക്‌സ്പ്രസ്, മഹാബോധി എക്‌സ്പ്രസ് എന്നിവയാണ് ഒരേ പാളത്തില്‍ ഓടുന്നതായി ഉദ്യോഗസ്ഥര്‍ കണ്ടെത്തിയത്. ഉത്തര്‍പ്രദേശിലെ അലഹബാദിലാണ് സംഭവം. കഴിഞ്ഞ കുറച്ചു മാസങ്ങളായി ട്രെയിന്‍ അപകടങ്ങള്‍ സാധാരണയാണ് ഇവിടെ. കുറച്ചു ദിവസങ്ങള്‍ക്ക് മുന്‍പ് ആഗ്ര ഗ്വാളിയോര്‍ പാസഞ്ചര്‍ ട്രെയിന്‍ ആഗ്ര കന്റോണ്‍മെന്റിനടുത്ത് വച്ച് പാളംതെറ്റിയിരുന്നു. ആര്‍ക്കും അപകടം ഒന്നും സംഭവിച്ചില്ല. കഴിഞ്ഞ മാസം ഉത്കാല്‍ എക്‌സ്പ്രസ് പാളംതെറ്റി 24 പേര്‍ മരിക്കുകയും 156 പേര്‍ക്ക് പരുക്കേല്‍ക്കുകയും ചെയ്തിരുന്നു.