തിരുവനന്തപുരം: ടൈറ്റാനിയം അഴിമതി കേസില്‍ രാഷ്ട്രീയക്കാരുടെ പങ്ക് അന്വേഷിക്കണമെന്ന ഹരജിയില്‍ കോടതി റിപ്പോര്‍ട്ട് ആവശ്യപ്പെട്ടു. ഇതുവരെ എന്ത് നടപടി സ്വീകരിച്ചുവെന്ന് വ്യക്തമാക്കിയ ഇടക്കാല റിപ്പോര്‍ട്ട് സമര്‍പ്പിക്കാനാണ് കോടതി വിജിലന്‍സിന് നിര്‍ദേശം നല്‍കിയത്. അടുത്ത മാസം ഏഴിന് കേസ് പരിഗണിക്കുമ്പോള്‍ റിപ്പോര്‍ട്ട് സമര്‍പ്പിക്കണം. തിരുവനന്തപുരം വിജിലന്‍സ് പ്രത്യേക കോടതി ജഡ്ജി അജിത്ത് കുമാറിന്റേതാണ് നിര്‍ദേശം.
ഇന്നലെ വിജിലന്‍സ് സംഘം ഇതുവരെയുള്ള അന്വേഷണത്തിന്റെ വിവരങ്ങള്‍ അടങ്ങിയ റിപ്പോര്‍ട്ട് സമര്‍പ്പിച്ചു. 2006 ല്‍ അന്നത്തെ മുഖ്യമന്ത്രി ആയിരിക്കെ ഉമ്മന്‍ചാണ്ടിയാണ് പദ്ധതിക്ക് അനുമതി നല്‍കിയത്. പ്ലാന്റിന്റെ നിര്‍മാണത്തിന് ആവശ്യമായ ഉപകരണങ്ങള്‍ ഇറക്കുമതി ചെയ്യുന്നതിന് അന്നത്തെ മലിനീകരണ നിയന്ത്രണ വകുപ്പിന്റെ ചുമതല ഉണ്ടായിരുന്ന മന്ത്രി കെ.കെ രാമചന്ദ്രനില്‍ അന്നത്തെ കെ.പി.സി.സി പ്രസിഡന്റായിരുന്ന രമേശ് ചെന്നിത്തല സമ്മര്‍ദം ചെലുത്തിയാണ് മെക്കോണ്‍ കമ്പനി വഴി ഫിന്‍ലന്‍ഡിലെ കമ്പനിക്ക് കരാര്‍ നല്‍കിയതെന്നും ഇതില്‍ അഴിമതി നടന്നുവെന്നുമാണ് ഹരജിയിലെ ആരോപണം.
മുന്‍ മുഖ്യമന്ത്രി ഉമ്മന്‍ചാണ്ടി, രമേശ് ചെന്നിത്തല തുടങ്ങിയവരെ ഉള്‍പ്പെടുത്തി വിജിലന്‍സ് എഫ്.ഐ.ആര്‍ രജിസ്റ്റര്‍ ചെയ്തിരുന്നു. ഇതിനിടെ കേസിലെ പ്രതിയും അന്നത്തെ ടൈറ്റാനിയത്തിലെ എന്‍ജിനീയറുമായ സന്തോഷ് എന്നയാള്‍ നല്‍കിയ ഹരജിയില്‍ ഹൈക്കോടതി കേസിന് സ്റ്റേ നല്‍കി. എന്നാല്‍, കേസ് നടപടിയുടെ മൊത്തത്തിലുള്ള സ്റ്റേ നീക്കിയ കോടതി സ്റ്റേ ഹരജിക്കാരന് മാത്രമായി പരിമിതപ്പെടുത്തി. ഇതേത്തുടര്‍ന്നാണ് അന്വേഷണം വീണ്ടും ആരംഭിച്ചത്.
2006ലാണ് ടൈറ്റാനിയം അഴിമതി കേസിന്റെ അന്വേഷണം ആരംഭിച്ചത്. ഇതിനിടയില്‍ കേസ് അവസാനിപ്പിക്കണമെന്ന് വിജിലന്‍സ് കോടതിയില്‍ അപേക്ഷ നല്‍കിയിരുന്നു. എന്നാല്‍, കോടതി ഈ ആവശ്യം തള്ളിയിരുന്നു.