തിരുവനന്തപുരം: കാന്‍സര്‍ രോഗികള്‍ക്ക് പെന്‍ഷന്‍ പദ്ധതിക്ക് അപേക്ഷിക്കുന്നതിന് പുതുതായി ഏര്‍പ്പെടുത്തിയ മാനദണ്ഡങ്ങള്‍ സര്‍ക്കാര്‍ പിന്‍വലിച്ചു.
തിരഞ്ഞെടുത്ത കേന്ദ്രങ്ങളിലെ ഓങ്കോളജിസ്റ്റുകള്‍ക്ക് മാത്രമേ മെഡിക്കല്‍ സര്‍ട്ടിഫിക്കറ്റ് നല്‍കാനാവൂ എന്ന നിര്‍ദേശമാണ് മുഖ്യമന്ത്രി ഇടപെട്ട് റദ്ദാക്കിയത്. കാന്‍സര്‍ രോഗികള്‍ക്ക് പെന്‍ഷന് അപേക്ഷിക്കണമെങ്കില്‍ തിരുവനന്തപുരം ആര്‍.സി.സി, മലബാര്‍ കാന്‍സര്‍ സെന്റര്‍, കൊച്ചിന്‍ കാന്‍സര്‍ സെന്റര്‍, മെഡിക്കല്‍ കോളജുകള്‍ എന്നിവിടങ്ങളിലെ ഓങ്കോളജിസ്റ്റുകള്‍ നല്‍കുന്ന മെഡിക്കല്‍ സര്‍ട്ടിഫിക്കറ്റ് മാത്രമേ സ്വീകരിക്കൂ എന്നായിരുന്നു നിര്‍ദേശം.
ഇത് വയനാട്, കാസര്‍കോട്, ഇടുക്കി ഉള്‍പ്പെടെയുള്ള ജില്ലകളിലെ കാന്‍സര്‍ രോഗികള്‍ക്ക് പ്രയാസമുണ്ടാക്കുന്നതായി കണ്ടെത്തിയതിനെ തുടര്‍ന്നാണ് മുഖ്യമന്ത്രി ഇടപെട്ടത്.
മെഡിക്കല്‍ സര്‍ട്ടിഫിക്കറ്റിനു വേണ്ടി ഗുരുതരാവസ്ഥയിലുള്ള രോഗികള്‍ക്ക് മറ്റു ജില്ലകളിലേക്ക് മണിക്കൂറുകള്‍ യാത്ര ചെയ്യേണ്ടിവന്നു. പെന്‍ഷന്‍ തുക മുന്നൂറില്‍നിന്ന് ആയിരമായി ഉയര്‍ത്തിയിട്ടും യാത്രാ ദുരിതം കാരണം പലരും അപേക്ഷിച്ചില്ല. നേരത്തെ പ്രദേശത്തെ ഏതെങ്കിലും സര്‍ക്കാര്‍ ഡോക്ടര്‍മാര്‍ സര്‍ട്ടിഫിക്കറ്റ് നല്‍കിയാല്‍ രോഗികള്‍ക്ക് പെന്‍ഷന് അപേക്ഷിക്കാമായിരുന്നു. ഈ രീതി മാറ്റിയതോടെയാണ് കാന്‍സര്‍ രോഗികള്‍ ദുരിതത്തിലായത്.
പുതിയ ഉത്തരവ് പ്രകാരം ജില്ലാ, ജനറല്‍ ആശുപത്രികളിലെ കീമോതെറാപ്പി ക്യുറേറ്റീവ് പാലിയേറ്റീവ്, റേഡിയോ തെറാപ്പി ഡോക്ടര്‍മാര്‍ക്ക് ഇനി മെഡിക്കല്‍ സര്‍ട്ടിഫിക്കറ്റ് നല്‍കാം. ഇത് സംബന്ധിച്ച അറിയിപ്പ് ജില്ലാ കലക്ടര്‍മാര്‍ക്കും മെഡിക്കല്‍ ഓഫിസര്‍മാര്‍ക്കും ആരോഗ്യ വകുപ്പ് കൈമാറി.