ലക്‌നോ: മകളുടെ കൊലപാതകികളെന്ന പേരില്‍ തടവറയില്‍ കഴിയേണ്ടി വന്ന തല്‍വാര്‍ ദമ്പതികള്‍ക്ക് ജയിലിലെ അവരുടെ സേവനത്തിന് ഒരു സ്‌നേഹ സമ്മാനം. ജയിലിലെ ഡെന്റ്ല്‍ ക്ലിനിക്കിന്റെ പേര് ആരുഷി എന്ന് ആക്കി മാറ്റാന്‍ സര്‍ക്കാര്‍ തീരുമാനിച്ചു. ദന്ത ഡോക്ടര്‍മാരായ ദമ്പതികള്‍ ജയിലില്‍ നല്‍കിയ സേവനം മുന്‍ നിര്‍ത്തിയാണ് തീരുമാനം.

ഇക്കാര്യം എത്രയും പെട്ടെന്ന് തല്‍വാര്‍ ദമ്പതികളെ  നേരിട്ട് അറിയിക്കുമെന്ന് ജയില്‍ മന്ത്രി പറഞ്ഞു.

ഇവര്‍ വരുന്നതു വരെ ക്ലിനിക്ക് തീര്‍ത്തും പ്രവര്‍ത്തന രഹിതമായിരുന്നു. ഇവരെത്തിയ ശേഷം തടവുകാരുടെ ദന്ത സംബന്ധിയായ രോഗങ്ങള്‍ക്ക് ചികിത്സ ലഭ്യമായി തുടങ്ങി- മന്ത്രി പറഞ്ഞു.

ജയില്‍ മോചിതരായപ്പോള്‍ ജയിലില്‍ സേവനം തുടരാന്‍ തയ്യാറാണെന്ന് തല്‍വാര്‍ ദമ്പതികള്‍ അറിയിച്ചിരുന്നു. 2008ലാണ് ഇവരുടെ മകള്‍ ആരുഷിയേയും വേലക്കാരനേയും വീട്ടില്‍ കൊല്ലപ്പെട്ട നിലയില്‍ കാണ്‌പ്പെടുന്നത്. ദുരഭിമാനക്കൊലയാണെന്നാരോപിച്ച് സി.ബി.ഐ തല്‍വാര്‍ ദമ്പതികളെ കസ്റ്റഡിയിലെടുത്തു. ഇവര്‍ക്ക് ജീവപര്യന്തം ശിക്ഷയും ലഭിച്ചു. 2013 മുതല്‍ ദസ്‌ന ജയിലിലായിരുന്നു ദമ്പതികള്‍.

ഈ മാസം ആദ്യമാണ് അലഹബാദ് ഹൈക്കോടതി ഇവരെ വെറുതെ വിടുന്നത്.