അഹമ്മദാബാദ്: ഐ.എസുമായി ബന്ധമുണ്ടെന്ന് കണ്ടെത്തിയ സാഹചര്യത്തില്‍ എയര്‍ ഹോസ്റ്റസ് ഗുജറാത്ത് ആന്റി ടെററിസം സ്‌ക്വാഡിന്റെ നിരീക്ഷണത്തില്‍. സൂറത്തിലും അങ്കലേശ്വറിലും വച്ച് കഴിഞ്ഞ ബുധനാഴ്ച രണ്ട് ഐ.എസ് പ്രവര്‍ത്തകരെ അറസ്റ്റ് ചെയ്തിരുന്നു. സൂറത്തില്‍ നിന്ന് പിടിയിലായിരുന്ന ഉബൈദ് മിര്‍സയുമായി എയര്‍ഹോസ്റ്റസിന് അടുത്ത ബന്ധമുണ്ടെന്നാണ് ഗുജറാത്ത് ആന്റി ടെററിസം സ്‌ക്വാഡ് പറയുന്നത്. ഇയാള്‍ അഭിഭാഷകനാണ്. അങ്കലേശ്വറില്‍ നിന്ന് പിടിയിലായ കാസിം സ്വകാര്യ ആശുപത്രിയിലെ ലാബ് ടെക്‌നീഷ്യനാണ്. ഇന്ത്യയിലേക്ക് സ്വര്‍ണം കള്ളക്കടത്ത് നടത്താന്‍ ഇവര്‍ എയര്‍ഹോസ്റ്റസിനെ ഉപയോഗപ്പെടുത്തിയിരുന്നു. ഉബൈദുമായി തമിഴ്‌നാട് സ്വദേശിയായ സബിയുള്ളയെന്ന യുവാവിനും ബന്ധമുണ്ടെന്നും എ.ടി.എസ് പറയുന്നു.
സ്വര്‍ണകള്ളക്കടത്ത്, യൂസ്ഡ് കാര്‍ കച്ചവടം എന്നിവയായിരുന്നു ഇയാളുടെ തൊഴിലെന്നും കണ്ടെത്തിയിട്ടുണ്ട്.
എയര്‍ഹോസ്റ്റസിനെ ഉപയോഗിച്ചാണ് ഇവര്‍ സ്വര്‍ണ കള്ളക്കടത്ത് നടത്തിയിരുന്നത്. തമിഴ്‌നാട്, മുംബൈ അല്ലെങ്കില്‍ അഹമ്മദാബാദ് എന്നിവിടങ്ങളില്‍ വച്ചാണ് സ്വര്‍ണക്കടത്തുമായി ബന്ധപ്പെട്ട പദ്ധതികള്‍ ആസൂത്രണം ചെയ്തിരുന്നതെന്നും എ.ടി.എസ് അധികൃതര്‍ വ്യക്തമാക്കി.