റിയാദ്: യമനിലെ സ്ഥിതിഗതികള്‍ വിലയിരുത്തുന്നതിനായി അറബ് സഖ്യസേനയിലെ രാജ്യങ്ങളുടെ വിദേശ മന്ത്രിമാരുടെ സുപ്രധാന യോഗം റിയാദില്‍ ചേര്‍ന്നു. യമനിലെ നിലവിലെ പ്രതിസന്ധികളും പ്രശ്‌നങ്ങളും തരണം ചെയ്യാനുള്ള പദ്ധതികള്‍ ആവിഷ്‌കരിക്കാനാണ് സുപ്രധാനയോഗം റിയാദില്‍ വിളിച്ചു ചേര്‍ത്തത്. യമനില്‍ നടന്നു കൊണ്ടിരിക്കുന്ന ജീവകാരുണ്യ പ്രവര്‍ത്തനമടക്കം വിവിധ കാര്യങ്ങള്‍ യോഗം ചര്‍ച്ച ചെയ്തു. സഖ്യസേനയുടെ ലക്ഷ്യ സാക്ഷാത്കാരത്തിന് വേണ്ട നടപടിക്രമങ്ങള്‍ കൈക്കൊള്ളാനും യോഗത്തില്‍ തീരുമാനമായിട്ടുണ്ട്.
    
യമനിലെ സമാധാന പുനഃസ്ഥാപനത്തിനായി ഏതറ്റം വരെ നീങ്ങാനും സഖ്യരാജ്യങ്ങള്‍ കരട് രേഖ തയ്യാറാക്കിയിട്ടുണ്ട്. യമന്‍ ജനതക്കും ഔദ്യോഗിക സര്‍ക്കാരിനും ആവശ്യമായ സംരക്ഷണം നല്‍കുന്നതില്‍സഖ്യസേനയുടെ മുഴുവന്‍ സഹായവും ഇനിയും തുടരാനാണ് തീരുമാനം. അതേസമയം, യമനില്‍ സഹായം ചെയ്യുന്നതില്‍ സഖ്യരാജ്യങ്ങളെ തടയുന്നത് ഇറാനാണെന്നു സഊദി വിദേശകാര്യ മന്ത്രി ആദില്‍ അല്‍ ജുബൈര്‍ യോഗത്തല്‍ ആവര്‍ത്തിച്ചു. ഇതിനു പുറമെ യമനിലെ വിവിധ വിഭാഗങ്ങള്‍ക്ക് എല്ലാ വിധ പിന്തുണയും ഊര്‍ജ്ജവും നല്‍കുന്നതും ഇറാനാണ്. യമനിലേക്ക് ആയുധങ്ങള്‍ കടത്തുന്നതും വിമതര്‍ക്ക് വിതരണം ചെയ്യുന്നതും ഇറാനാണ്. സമാധാന ശ്രമങ്ങള്‍ക്ക് വിഘാതമാകുന്ന പ്രവര്‍ത്തനങ്ങളാണ് ഇറാന്‍ യമനില്‍ നടത്തുന്നതെന്നും അദ്ദേഹം ആരോപിച്ചു.