ചങ്ങരംകുളം: 2016-17 വാര്‍ഷിക പദ്ധതി ഓണ്‍ലൈനായി സമര്‍പ്പിച്ച് അംഗീകാരം നേടുന്ന സംസ്ഥാനത്തെ ആദ്യ തദ്ദേശ സ്ഥാപനമായത് പെരുമ്പടപ്പ് ബ്ലോക്ക് പഞ്ചായത്ത്. 9.8 കോടി രൂപയുടെ അടങ്കല്‍ തുകക്കുള്ള പദ്ധതിക്ക് ജില്ലാ ആസൂത്രണ സമിതി അംഗീകാരം നല്‍കി.
ഓണ്‍ലൈന്‍ പദ്ധതി സമര്‍പ്പണത്തില്‍ തൃശൂര്‍ ജില്ല ഇപ്പോള്‍ മൂന്നാമതാണ്. കൃതൃമായ ആസൂത്രണത്തിലൂടെയും, ചിട്ടയോടെയുള്ള പ്രവര്‍ത്തനത്തിലൂടെയുമാണ് സ്ഥാപനം ഈ നേട്ടം കൈവരിച്ചത്. നിയമസഭാ തിരഞ്ഞെടുപ്പിന് മുന്‍പ് തന്നെ വര്‍ക്കിങ് ഗ്രൂപ്പ് പുനഃസംഘടനയും, മീറ്റിങ്ങും നടത്തി നിര്‍ദേശങ്ങള്‍ സ്വീകരിച്ച് ബ്ലോക്ക് ഗ്രാമസഭ, വികസന സെമിനാര്‍ അടക്കമുള്ള പ്രവര്‍ത്തനങ്ങളും ബജറ്റ് അവതരണവും നടത്തിയിരുന്നു.
എന്നാല്‍ പ്ലാന്‍ സൈറ്റിന്റെ സാങ്കേതികമായ തടസം മൂലം ജില്ലാ ആസൂത്രണ സമിതിയുടെ അംഗീകാരം ലഭിക്കാന്‍ കഴിഞ്ഞില്ല. ഇക്കാരണത്താല്‍ അഞ്ച് മാസമായി പ്രവര്‍ത്തനങ്ങള്‍ നടത്താന്‍ കഴിഞ്ഞിരുന്നില്ല. അടുത്ത മാര്‍ച്ചിന് മുന്‍പ്തന്നെ അംഗീകാരം ലഭിച്ച മുഴുവന്‍ പദ്ധതികളും നിര്‍വഹണം നടത്തി 100 ശതമാനം നേട്ടം കൈവരിക്കാനുള്ള ശ്രമത്തിലാണ് ഭരണസമിതിയും ജീവനക്കാരും.